सर्वांचे मनःपूर्वक आभार. डॉ. साहेब, जयंतराव, नाईल - हे फोटो ९० एम एम फिक्स्ड फोकल लेंग्थ मॅक्रो लेन्स वापरून काढले आहेत. मॅक्रोमध्ये मूलतः डेप्थ ऑफ फिल्ड कमी असते आणि ते विषयाला साधक व पूरक ठरते. जर थेंब व संपूर्ण पात स्पष्ट आले तर चित्र सपाट होईल, त्यातील प्रभाव कमी होईल. ही चित्रे अगदी जवळुन म्हणजे काही इंचांवरुन प्रसंगी जमिनीवर पार आडवे पडुन अशा प्रकारे घ्यायचा प्रयत्न केला की मूळ विषय स्पष्ट व परिसर धूसर व्हावा. पोर्ट्रेट घेतानाही चेहर्‍याच्या पलिकडचे सर्व प्रकर्षाने धूसर केले जाते. मॅक्रो मध्ये प्रयत्न पूर्वक डेप्थ ऑफ फिल्ड वाढविली जाते ती फूले टिपताना ज्या योगे संपूर्ण फूल स्पष्ट दिसेल, अन्यथा काही पाकळ्या स्पष्ट व काही अस्पष्ट होतात. अर्थात याचा कलात्मक वापर केला तर चित्र सुंदर दिसते. शेवटच्या चित्रात बारकेसे थेंब व पाने एकाच प्रतलावर असल्याने व थेंब हे पानाच्या मानाने खूपच लहान असल्याने सर्व काही बर्‍यापैकी स्पष्ट आहे या उलट इवल्याश्या पात्यावर टपोरा थेंब टिपताना तो स्पष्ट साधला तर पाते अस्पष्ट होते व ते तसे झाल्याने थेंब खुलतो. या निमित्ताने झालेली चर्चा पाहता खूप आनंद झाला. मिपावर अनेक प्रतिभावंत आहेत आणि ते कलाकृति बारकाईने पाहतात, अभ्यास करतात व उत्तम सूचनाही देतात हे मोठेच आहे. एक प्रस्ताव असा की सर्व चित्रण प्रेमींनी आपल्याला आवडलेले एखादे चित्र इथे द्यावे व त्यावर इतरांच्या प्रतिक्रिया व त्यांचे आकलन इतरांनी द्यावे ज्यायोगे चित्राच्या प्रभावी बाजु तसेच सुधारणांच्या जागा यावर चर्चा होईल व त्यानिमित्ताने माझ्यासारख्या हौशी माणसाला काही शिकायला मिळेल व चित्रणकलेत सुधारणा करता येईल. धन्यवाद.