..बेंगलोर पासपोर्ट सेवा केंद्रामधील गम्मत..

माझा पासपोर्ट नुकताच एक्स्पायर झाला त्यामुळे नव्या पासपोर्टसाठी अर्ज केला होता. मोठ्या मुश्किलीने अर्ज केल्यानंतर दोन महीन्यांनी पासपोर्ट सेवा केंद्रात अपॉईंटमेंट मिळाली. जाताना पुन्हा हेलपाटा नको म्हणुन लागणार्या सर्व कागदपत्रांची दोन दोन झेरोक्स प्रत बरोबर ठेवली होती. थोडक्यात माशी कुठेही शिंकु नये ह्याची योग्य खबरदारी घेतली होती. पण शिंकायची तिथे माशी शिंकलीच. माझे अप्लिकेशन फेटाळुन लावण्यात आले. कारण.. माझ्याकडे माझे स्वतःचे अ‍ॅड्रेस प्रूफ डॉक्युमेंट नव्हते. पण मी विवाहीत आहे आणि माझ्या पत्नीच्या नावाचे तसे डॉक्युमेंट आहे. त्यामुळे माझ्या बाळबोध बुध्दीनुसार माझे मॅरेज सर्टिफिकेट आणि बायकोचे अ‍ॅड्रेस प्रूफ ह्या दोन कागदपत्रांनुसार माझ्याही अ‍ॅड्रेस प्रूफ चा प्रश्न निकालात (!) निघु शकला असता. पण तिथला अधिकारी माझ्यापेक्षा हुशार निघाला. त्याच्या नुसार.. तुमच्या मॅरेज सर्टिफिकेटनुसार तुम्ही विवाहीत आहात हे सिध्द झाले. तुमच्या पत्नीच्या अ‍ॅड्रेस प्रूफ कागदपत्रानुसार ती अमुक अमुक ठिकाणी राहते हे सिध्द झाले. पण तुम्ही आणि ती एकत्र राहाताहात ह्याचा कुठालाही पुरावा नाही. सबब अर्ज फेटाळुन लावण्यात येत आहे. .. मेंदु मध्ये झिणझिण्या घेऊन मी बाहेर पडलो. पासपोर्ट ऑफिस मध्ये जायच्या आधी माझा जर अ = ब असेल आणि ब = क असेल तर तर्कशास्त्रानुसार अ = क ह्या सिध्दतेवर विश्वास होता पण आता अ = ब ह्या गृहितकावरच माझा विश्वास राहीला नाही. ! आता स्वतःच्या अ‍ॅड्रेस्-प्रूफसाठी कराव्ह्या लागणार्या द्रविडी प्राणायामाची मानसिक तयारी करतो आहे.