मिपावर फायनान्सची तोंडओळख ही लेखमाला असावी का?

नमस्कार मंडळी, फायनान्स या विषयावर मराठीतून काहीतरी लिहावे असा विचार बऱ्याच दिवसांपासून माझ्या मनात घोळत आहे.त्यासाठी मी या नव्या ब्लॉगची सुरवातही केली आहे.या ब्लॉगवर फायनान्स हा विषय शक्य तितक्या सोप्या मराठीत समजावून सांगायचा माझा प्रयत्न असेल.तसेच मुख्यत्वे मराठी भाषेचा वापर करायचा प्रयत्न असला तरी काही इंग्रजी संज्ञांचे भाषांतर करून नवे मराठी शब्द बनविण्याच्या फंदात न पडता अशा संज्ञा जशाच्या तशा इंग्रजीतच वापरल्या जातील.मला जो विषय अतोनात आवडला त्याची निदान वरवरची ओळख तो विषय नवा असलेल्यांना करून द्यावी असा माझा विचार आहे. त्यासाठी मी लेख लिहायला सुरवातही केली आहे.आतापर्यंत सहा लेख लिहून पूर्ण आहेत आणि असे बरेच (नक्की किती हे या क्षणी सांगता येणार नाही.पण वीसपेक्षा नक्कीच जास्त) लेख वेळ मिळेल त्याप्रमाणे लिहायचा मानस आहे.यात फायनान्सच्या विविध संकल्पनांची माहिती करून देणे आणि शेवटी फायनान्समधील विविध करियरच्या संधी आणि त्यासाठी कोणत्या प्रकारची शैक्षणिक पार्श्वभूमी गरजेची आहे आणि या करियरच्या विविध नोकऱ्यांसाठी नक्की कोणत्या प्रकारची स्कील लागतात यावर भाष्य करून लेखमाला संपवायचा मानस आहे.या विषयाची काहीही माहिती नसलेल्या वाचकाच्या दृष्टीने त्या त्या लेखाचा विषय समजायला किती सोपा/अवघड आहे याप्रमाणे प्रत्येक लेखाच्या सुरवातीला (सोपा/मध्यम/अवघड) ही काठिण्यपातळीही लिहायचा विचार आहे. मिपाकरांना ही लेखमाला वाचायला आवडेल का?तसे असल्यास माझ्या ब्लॉगवरील सगळे लेख मी मिपावरही लिहू शकेन.त्या दृष्टीने चाचपणी करण्य़ासाठी हा कौल घेत आहे.सगळी लेखमाला साधारण दहा दिवसात सुरू होऊन ती पूर्ण होण्यास काही महिनेही लागू शकतील.तसेच वाचकांच्या प्रतिक्रिया/सूचना लक्षात घेऊन लेखात पाहिजे ते बदलही करता येतील.तसेच अकाऊंटिंग या भागासाठी सी.ए आणि त्या क्षेत्रातील वाचकांनी मार्गदर्शन केल्यास ते चांगले होईल. तसेच कोणते शेअर चांगले/वाईट, कोणती गुंतवणुकीची स्कीम चांगली/वाईट याविषयी मला स्वत:ला माहिती नसल्यामुळे अर्थातच त्याविषयी काही लिहिता येणार नाही.तर फायनान्सची तत्वे या लेखमालेत लिहायचा मानस आहे. मध्यंतरी मिपावर लेखांची चोरी झाल्याचे वाचले.त्यामुळे लिहिताना थोडे हातचे राखूनच लिहिणार आहे. तेव्हा अशी लेखमाला मिपावरही असावी का?या कौलात अजून एक आठवडा म्हणजे १९ फेब्रुवारीपर्यंत आपले मत नोंदवता येईल. याविषयी आपले मत/सूचना आणि इतर टिप्पणी जाणून घ्यायला आवडेल.

नमस्कार मंडळी, सर्वांच्या प्रोत्साहनाबद्दल धन्यवाद. जवळपास सगळेच "हो" येतील असे वाटले होते.तेव्हा या कौलाचे प्रयोजन म्हणजे मी लेखमाला लिहायला लवकरच सुरवात करणार आहे हे जाहिर करणे हेच होते. :) साधारणपणे आठवड्यात लेखमाला सुरू करायचा बेत होता पण पहिला भाग (खरं म्हणजे शून्यावा भाग) आजच अपलोड करत आहे. Nile यांनी इकॉनॉमिक्स आणि मार्केटिंग यांचाही एकत्र समावेश केला तर चांगले होईल असे म्हटले आहे.त्याविषयी शंका घेण्यासारखे काहीच नाही.पण माझे स्वत:चे मार्केटिंगचे ज्ञान त्यामानाने तोकडेच आहे.तो विषय मला फारसा आवडत नसल्यामुळे मी त्या विषयाशी संबंधित एकही elective दुसऱ्या वर्षात घेतलेला नव्हता.तेव्हा मी फायनान्सवरच लक्ष केंद्रित करणार आहे.अशा स्वरूपाचे कोणा मिपाकराने मार्केटिंग आणि धोरण (Strategy) वर लिहिले तर फारच उत्तम. वल्ली यांनी म्हटले की कंपन्यांची फायनान्शियल स्टेटमेन्ट कशी अभ्यासायची याविषयी लिहिले तर चांगले होईल. "Fundamental Analysis" हा तसा खूप मोठा विषय आहे.त्या एका विषयावर मोठी पुस्तकेही उपलब्ध आहेत.तरीही त्या विषयाची धावती ओळख, विशेषत: Ratio Analysis ची ओळख नक्कीच करून देणार आहे. या प्रतिसादकर्त्यांबरोबरच रामदास, सहज,अवलिया, नितिन थत्ते,स्वाती२, विकास,परा,गणपा,मस्त कलंदर, शाहरूख, पंगा, अदिती, नंदन,नरेशकुमार, विजूभाऊ आणि तिरसिंगराव माणुसघाणे यांच्या प्रोत्साहनाबद्दलही धन्यवाद.बहुदा आतापर्यंत प्रतिसाद देणाऱ्या सर्व मिपाकरांची नावे इथे लिहिली आहेतच.तरीही नजरचुकीने एखादे नाव राहिले असल्यास त्याबद्दल दिलगिरी.त्याचप्रमाणे या कौलात प्रतिसाद न लिहिता मत देणाऱ्या इतर मिपाकरांचेही आभार. लेखमालेशी संबंधित चर्चेत सहभाग घेऊन आपले मत, अभिप्राय जरूर नोंदवा ही विनंती. एखादी गोष्ट आवडली/आवडली नाही किंवा समजली/अवघड वाटली या सगळ्या गोष्टी आणि काही त्रुटी असल्या तर त्याही जरूर लिहाव्यात ही विनंती.म्हणजे पुढील लेखांमध्ये त्याप्रमाणे बदल करता येतील.