नमस्कार मित्रांनो/मैत्रिणींनो, झोप. निसर्गाने सर्व प्राण्यांना दिलेलं एक वरदानच म्हणता येईल. झोप घेण्याने थकवा आणि शरिराची झीज भरुन येते. झोप किती तासांची असावी, कधी झोपावे कधी उठावे याबाबत बरेचसे युक्तीवादपण होत असतात. पण या झोपेचे खरं तर एक रहस्यच आहे. झोपेत माणुस कसा असतो हे त्याला कधीच कळत नाही. खरं तर झोप म्हणजे मेल्यानंतर जी अवस्था होत असावी तीच असं माझं मत आहे. असो, तर या झोपेचेही व्यक्ती तितक्या प्रकृती म्हणीप्रमाणे प्रकार आहेत. यावरुन गमतीजमतीही बर्‍याच होताना दिसतात. दिवसा झोपणे आणि रात्री झोप न येणे आणि दुसर्‍या दिवशे ऑफिसात झोप येणे हा एक जगभर पहायला मिळणारा प्रकार आहे. रविवारी दुपारी गोडधोड आणि जड जेवण करुन संध्याकाळपर्यंत लोळत पडणे आणि सोमवारी दुपारी ऑफिसात पेंगत बसणे हा एक अलिखित कायदा बनला आहे आणि सर्वजण याचे अगदे मनोभावे पालन करतात. काही लोकांना कधीही आणि कुठेही झोप येते, मग ऑफिसातली मीटींग असो किंवा बसमधला प्रवास. यांना वेळ काळ काही नियम लागू होत नाहीत. काहींना अंधार करुन झोपायची सवय असते. मग अगदी भर दुपार का असेना, हे खिडकीला चादरी बांधुन अंधार करतात, मोबाइल सायलेंट करुन गाढ झोपी जातात. काहींना पंख्याशिवाय झोप येत नाही, मग बाहेर कितीही थंडी असो, स्वेटर घालुन, दोन गोधड्या अंगावर घेतील पण पंखा चालुच ठेवतील. रात्री लाईट्स गेले आणि पंखा बंद झाला तर यांना कितीही गाढ झोपेतुन जाग येते. काही जणांना सकाळी नाष्ता केल्यानंतर झोप येते, अगदी लहान बाळांना अंघोळ घालुन छान टिक्की पावडर करुन शालीत लपेटुन पाळण्यात झोपवतात तसे यांना सकाळी सकाळी अंघोळ करुन नाष्ता केला की पुन्हा बेड आणि रजई दिसायला लागते. घोरणे या अत्यंत भयानक प्रकार. मग स्त्री असो वा पुरुष. काहीजण ईतक्या लयीत घोरतात की एखाद्य गाण्याच्या मैफीलीत सुद्धा हा माणुस ठेक्याला ताल देतोय असे वाटावे. काही जणांचे घोरणे रात्री घड्याळ्याच्या काट्याच्या आवाजाच्या तालावर चालु असते, म्हणजे इकडे टीक वाजला की दुसर्‍या टीक पर्यंत श्वास घेणे आणि पुढचे दोन तीक टीक ब्रेक मधे घोरत श्वास सोडणे. काही जण वाघासारखी डरकाळी फोडुन नागासरखा फुस्स करुन फुत्कार सोडतात, जोडीदार असा असला तर काही खरं नाही ब्वॉ. मला वाटतं लग्नासाठी सर्वांनी अपेक्षेमधे ही पण एक रिक्वायरमेंट ठेवायला हवी. ;) झोपेत चालणे म्हणजे अजबच, मी स्वत: एकदा रात्री झोपेत उठुन घरभर फिरत होतो. आईने मला दुसर्‍या दिवशी सांगितलं, मला स्वत:चीच भिती वाटली. पुढचा एक आठवडा मी हाताला दोरी बांधुन खिडकीला गाठ मारुन ठेवत असे. काहे लोकं नुसती चालतच नाहीत तर बोलतात सुद्धा. एखाद्याला भितीनेच हार्ट अ‍ॅटॅक यावा असा प्रकार. माझा एक मित्र झोपेत उठुन अंघोळ करुन तयार होऊन कॉलेजला गेल्याचही आठवतय, पहाटे ३:३० ला ;). मानवी मेंदु म्हणजे समजायला अवघडच ब्वॉ. :) प्रवासात झोपणारे आणखीनच विचित्र प्रकार. काही लोकांना तोंड उघडे ठेवुन झोपायची सवय असते, अशा वेळी फारच विचित्र दिसतात हे लोकं. काहींना टेकु हवा असतो, मग बाजुच्याच्या खांद्याला उशी समजुन निर्ल्लजपणे झोपी जातात आणि आपल्याला दर थोड्या वेळाने खांदे उडवत बसावं लागतं. मग यांची मान दोलकाप्रमाणे ठराविक वेळानंतर पुन्हा तुमच्या खांद्याकडे झुकते, पुढचे स्टेशन्/स्टॉप येईपर्यंत हे दोलक घड्याळ चालु असते. झोपेत माणसाच्या पोझिशन सुद्धा कॉमेडी असतात. काही स्वतःला गोळा करुन झोपतात, इतके की माणुस झोपलाय की एखादी गुंडाळलेली चादर आहे अशी शंका यावी. काहींना शरीराचा काटकोन करुन झोपायची सवय असते, मग कधी उजवीकडे तर कधी डावीकडे. काहींना पालथं झोपुन पार्श्वभाग उंचावुन झोप लागते. म्हणजे एखाद्याला लाथ घालायची इच्छा होईल असे. झोपेत स्वप्न पाहुन बरळणारे, हसणारे, ओरडणारे आहेतच. झोपेमुळे गाड्या, फ्लाईट्स चुकवणारे आहेत. आणि संध्याकाळी डाराडुर झोपुन रात्री झोप न येण्याने लेख लिहिणारे माझ्यासारखे सुद्धा. ;)