पनीर माखनवाला

साहित्य : १/२ कि. पनीर , १/२ कि. कांदा , आलं पेस्ट , लसूण पेस्ट , हळद , लाल तिखट , काजू पेस्ट ( १ वाटी ) , तेल , तूप , मावा , साखर , मीठ , टमाटू प्युरी १/२ वाटी , लवंग , काळी मिरी , दालचिनी , तमालपत्र , मासाला वेलची . खायचा रंग ( लाल ) , कोथिंबीर. कृती : प्रथम कांदा लांबडा चिरून घ्यावा , पनीरचे बारीक तुकडे करावे . कढईमधे थोडं तेल गरम करून त्यात लवंग , काळी मिरी , दालचिनी , तमालपत्र , मासाला वेलची घालून तडतडू लागलं की त्यात चिरलेला कांदा घालून तो लाल होइपर्यंत परतून घ्यावा , हा कांदा गार करून मिक्सर मधून बारीक वाटून घ्यावा. आता दुस-या पातेल्यात तेल व तूप एकत्र करून ते तापल्यावर त्यात वाटलेला कांदा घालून परतावा ( कांद्याचे पाणी जावून तो बाहेर उडायला लागतो ) हे वाटण चांगले परतल्यावर त्यात आलं लसूण पेस्ट घालून ती नीट शिजेपर्यंत अजून परतत रहावे. नंतर त्यात काजूची पेस्ट घालून किमान १५ मि. ती पेस्ट परतली जायला हवी . नाही तर नंतर ती कच्ची रहिल्याचा वास येतो.काजू पेस्ट चांगली शिजल्यावर त्यात टमाटू प्युरी घालून मिश्रण एकजीव होइपर्यंत ढवळावे. अगदी थोडी हळद व लाल तिखट घालून ( तिखटही कमीच घालावे कारण हा पदार्थ गोड असतो ) ढवळत रहावे. थोडा रंग घालून एकजीव झाल्यावर त्यात २ चमचे साखर व १/२ वाटी मावा घालून मावा विरघळेपर्यंत ढवळत रहावे. सर्वात शेवटी कच्चा पनीर घालून तो शिजला की कोथिंबीरीने सजवून पोळी , पराठा , नान इ. बरोबर गरम सर्व करावे.