व्हाॅट्सअपवरची माणसं - व्हर्जन २०२४

*व्हाॅट्सअपवरची माणसं - व्हर्जन २०२४* *कट्टर भाजप समर्थक* : यांना देशातल्या प्रत्येक राज्यातच नव्हे तर देशातल्या प्रत्येक गावातला प्रत्येक ग्रामसेवक हा सुद्धा भाजपचाच हवा असतो. त्यामुळे सतत मोदी किंवा भाजप , राममंदिर यांच्या पोस्टचा तुफानी मारा करणे हेच आपल्या जीवनाचे ध्येय असल्यासारखे पोस्टत राहतात. समजा एखाद्या समूहात सगळे भाजप समर्थक आहेत हे माहिती असले तरीसुद्धा ; समजा जर आपण हा मारा थांबवला आणि चुकून त्यातला एखादा भाजपपासून थोडासा लांब गेला ; त्याची विचारसरणी ही भाजपला प्रतिकूल अशी बनली तर काय करायचं ? तशी वेळच येऊ नये म्हणून हे मुसळधार पाऊस जसा पडतो तसं भाजप , राममंदिर , संघ , नरेंद्र मोदी हे चार प्रकारचे बाण सतत मारत राहतात. *अतिजेष्ठ* : नोकरीतून निवृत्त होऊन साधारणपणे दहा पंधरा वर्षे झालेली असतात. घरात बसून करायचं काय? बायकोला कटकट नको असते. नातवंडे , मुले आपापल्या व्यापात असतात. मग करायचं काय म्हणून हे लोक कुठलातरी व्हाट्सअप ग्रुप पकडतात. शांतपणे वाचन चालू असतं. कधी कुठे काही आपला अनुभव उपयोगी पडतो असं वाटत असलं तर ते लिहितात सुद्धा. पण विरंगुळा म्हणून पकडलेला व्हाट्सअप ग्रुप त्यांना फार काळ सोसवत नाही. कारण स्क्रीनचा उजेड , टाईप करणे ही खिंड त्यांना फार काळ लढवता येत नाही. मग वैतागून ते अचानक सोडून जातात. *कायमचे वाचक* : कायमचे वाचक हे कुठल्याही ग्रुपात शिरल्यानंतर पहिल्या क्षणापासून ते त्या ग्रुपात असेपर्यंत केवळ वाचकच राहतात. आपणही माणूस आहोत , आपले आज जे काही वय आहे त्या वयात येईपर्यंत आपणही उघड्या डोळ्यांनी हे जग बघितलेलं आहे , काहीतरी अनुभव घेतलेला आहे , आपल्याकडच्या एखाद्या चांगल्या माहितीचा कोणाला तरी काहीतरी उपयोग होऊ शकतो , अनुभवाचा उपयोग होऊ शकतो वगैरे शूद्र विचार यांच्या मनालाही शिवत नाहीत. आपल्याला परमेश्वराने या व्हाट्सअप ग्रुपवर दाखल केलेलं आहे ते फक्त वाचण्यासाठीच. आपण या ग्रुपची शान आहोत , आपण वाचतो आहोत म्हणूनच या ग्रुपवर कोणीतरी काहीतरी लिहिते आहे. आपण जर या ग्रुपमधून बाहेर गेलो तर मग यांचं लिहिलेलं वाचणार कोण? असा काहीतरी भ्रम होऊन लिहिणाऱ्यांना उपकृत करण्याच्या उद्देशाने हे तिथे शांतपणे महिनोंमहिने , वर्षानुवर्षे फक्त वाचत राहतात. *देवाची तिजोरी* : देवाची तिजोरी गटातल्या लोकांकडे दैवी शक्ती भरपूर असते. देवीदेवतांचे व्हिडिओ , फोटो , गाणी हा सगळा माल बक्कळ असतो. कुठून तरी आलेले हे देवादिकांचे फोटो , व्हिडिओ किंवा ते कमी पडले तर शेअरचॅट वरून उतरवून घेतलेले व्हिडिओज हे फॉरवर्ड करत राहतात. देवाची तिजोरी ; भक्तीचाच ठेवा ; तुम्हाला द्यायलाच हवा असं म्हणून या भक्तीसागराचा व्हॉल्व ते पूर्णपणे ओपन करतात. हे मुख्यत्वे ज्येष्ठ नागरिकच असतात.यांच्या दैवी व्हिडिओ , फोटोजना बरेच भक्त दोन हातांनी वंदन केलेली इमोजी पाठवून भक्तीभाव दाटून आल्याची पावतीही देतात. *कुतूहलाचे किडे* : यांना व्हाट्सअपवरची बरीच फीचर्स नवीन असल्याने यांच्या आतले कुतूहल चाळवले जाते. मग हे कधी ग्रुप कॉल सुरू करतात तर कधी व्हिडिओ कॉल सुरू करतात. Admin ने ग्रुप परमिशन सेट केलेल्या नसतील तर हे एडमिन ओन्ली म्हणजे नक्की काय असतं ते वापरून बघतात. जमतील तेवढी फिचर्स वापरून त्या ग्रुपचे खेळणे करून आपलं बालसुलभ कुतूहल शमवू बघतात. मग त्यानंतर admin त्यांना ओरडतो किंवा मनातल्या मनात शिव्या घालत त्यांनी केलेली सेटिंग पूर्ववत करत बसतो. *शुभेच्छुक* : इतरवेळी चर्चेत कधीही भाग न घेणारे , काही माहिती न देणारे हे लोक सणावाराला मात्र आवर्जून शुभेच्छा देतात. त्या पण अक्षरी नव्हे. कुठून तरी चित्र/फोटोरुपी बॅनर घेऊन येतात. नव्या वर्षाचे स्वागत असो , हनुमान जयंती असो , राम नवमी असो , गुढीपाडवा असो , दसरा , दिवाळी असो. त्या सणाच्या दिवशी येतातच. यांच्या आधी कोणी शुभेच्छा दिलेल्या असल्या तरी त्या आपण दिलेल्या नसल्याने दुसऱ्याचे पोस्टर आपले कसे समजायचे? असा विचार करून हे स्वतःकडचे तसेच शुभेच्छा असणारे पोस्टर चिटकवून जातात. :) :) :)