चालू घडामोडी - मे २०२१ (भाग ४)

मलाही सर्व गोश्टी समजतात असा माझा आजिबात समज नाही. म्हणूनच एकमेकांना समजावण्यापेक्षा समजुन घेण्यावर माझा जास्त विश्वास आहे.

आय एम ए आणि सरकार यांची मत भिन्नता असणे साहजिक आहे. (कृपया यात राजकीय/पक्षीय दृष्टिकोन आणू नये) दोघे जण कुठे तरी बरोबर आणि कुठेतरी चूक आहेत. आय एम ए चे म्हणणे असे आहे कि सरकार ने एक वर्षाचा ब्रिज कोर्स करून आयुषच्या( आयुर्वेदिक, युनानी, सिद्ध आणि होमिओपॅथी) डॉक्टरांना आधुनिक औषधे देण्याची परवानगी देणे हे चूक आहे. यात बरेचसें तथ्य आहे कारण जेवढ्या खोलवर आधुनिक वैद्यकाचा अभ्यासक्रम आहे तेवढा काळ इतर पॅथी त्याचा अभ्यास करत नाहीत. ( उद्या मी चार बुके वाचून/एक वर्षाचा ब्रिज कोर्स आयुर्वेदिक/ होमिओपॅथिक औषधे देणे जितके चुकीचे आहे तितकेच हे चूक आहे) सरकारचे असे म्हणणे आहे कि खेडोपाडी( आणि शहरातील झोपड्यात) सेवा देण्यासाठी आपल्याकडे पुरेसे एम बी बी एस नाहीतच मग तिथे सेवेत असणाऱ्या आयुष व्यावसायिकांना आधुनिक औषध शास्त्राचे ज्ञान देऊन ते देत असलेली सेवा सुधारणे आवश्यक आहे. कारण लसीकरण, सरकारी आकडे संकलन, शालेय आहार सेवा, कुटुंब कल्याण अशा अनेक ठिकाणी त्यांचा उपयोग होतो आहे. (याशिवाय देशभर पसरलेली आयुर्वेदिक आणि होमिओपॅथिक कॉलेजेस बहुसंख्य राजकारण्यांनी चालवलेल्या संस्थांची आहेत. त्यामुळे त्यांना विद्यार्थी मिळणे हे राजकारण्यांच्या आर्थिक आरोग्यासाठी आवश्यक आहे) दोन्ही संस्था आपल्या जागी कदाचित बरोबर आहेत. बाबा रामदेव काय किंवा होमिओपॅथी काय यांचा भर आधुनिक औषधांचा साईड इफेक्ट यावर आहे. कारण त्यावरच ते आपले दुकान चालवतात. खरं तर बाबा रामदेव आणि आयुर्वेदिक औषधे यांचा तसा काही संबंध नाही. परंतु परंपरागत घरगुती औषधे व्यावसायिक पातळीवर नेऊन त्यांचे विपणन आणि विक्री करून आपला व्यवसाय वाढवण्यासाठी रामदेव बाबाना आयुर्वेदाचा आधार फायद्याचा ठरतो. त्यासाठी त्यांना आधुनिक औषधांना शिव्या घालणे हे धंद्याच्या दृष्टीने आवश्यक आहे. येथेच समानशीले व्यसनेषु सख्यम या न्यायाने आयुषचे काही लोक हिरीरीने पुढे येताना दिसतात. समस्त आयुर्वेदाचार्य सांप्रतची जीवनशैली आणि आधुनिक आहारशैली कशी चूक आहे आणि पूर्वी ऋषी मुनी कसे स्वस्थ जीवन जगत होते हे मोठ्या उत्साहाने सांगत असतात परंतु हि जीवनशैली स्वीकारणे किती लोकांना शक्य आहे याबद्दल मूक असतात ? तसेच ऑरगॅनिक फूड वाले आणि हर्बल उत्पादने विकणारे आधुनिक अन्न आणि औषधांमुळे आपले शरीर कसे विषभारित झाले आहे हे कानी कपाळी ओरडत असतात. यातून सामान्य माणसांना एक न्यूनगंड निर्माण होतो आणि ते डिटॉक्सिफीकेशन पासून पंचकर्म सारख्या अनेक शुद्धीकरणाच्या कर्मकांडात शिरताना दिसतात आणि हाच धंद्याचा सर्वात मोठा भाग आहे. हा काहीही मुद्दा असला तरी आरोग्य मंत्र्यांनी कोणत्याही खाजगी कंपनीच्या औषधाच्या प्रसिद्धीसाठी तेथे उपस्थित राहणे हे चूकच आहे मग ते आयुर्वेदिक असो किंवा आधुनिक वैद्यकाचे असो. लसीकरण किंवा तत्सम सरकारी कार्यक्रमास त्यांनी उपस्थित राहणे समजू शकतो. हा विषय फार मोठा आहे.