वनवास

टीव्हीवर रामायण बघताना प्रश्न विचारून बाबाला भंडावून सोडलं तिने. नीट जेवूही नाही दिलं. जमतील तेवढी उत्तरं बाबाने दिली. तिला जवळ घेत, "तू माझा लक्ष्मण आहेस." असं लाडाने म्हटलं. जेवल्यानंतर, आई बाबांचं, सध्याच्या कोरोनाच्या काळात कामाला जाणं म्हणजे वनवासाला जाणं असं काहीतरी चालू होतं. रात्री झोपताना रामायणातल्या गोष्टी ऐकत झोपली आणि सकाळी ती उठायच्या आधीच बाबा कामासाठी गेला होता. दिवसभर तिने उशीला, पडद्याला, रावण करून त्यांच्याबरोबर लढाई केली. आईचे धपाटेही खाल्ले. संध्याकाळी दाराची बेल वाजताच, धावत जाऊन तिने दरवाजा उघडला. बाबाच्या पायांना बिलगून डोळ्यात पाणी आणून तिने विचारले, "मी तुझा लक्ष्मण आहे ना? मग तू मला वनवासात सोबत का नाही नेलं?"