किमया

सांग ही किमया कशाची?
मी नवी, जग हे नवे
सांगती माझी कहाणी
पाखरांचे हे थवे

पाहते मी रूप माझे
चांदण्यांच्या दर्पणी
कोण उधळित गंध फुलवी
संचिताच्या अंगणी
सप्तरंगी इंद्रधनूचे
रंगगहिरे ताटवे?

शोधले मी आज माझे
हरवलेले सूरही
आणि वा-याने सुरांना
बांधले नूपूरही
गीत माझे मोरपंखी
भावनांना जागवे

मीच गाणे कोकिळेचे
चातकाची मी तृषा
मीच कातर सांज हळवी
मी उषा अन मी निशा
ज्योत माझ्या अन्तरीची
वाट मजला दाखवे