तिचे हासणे चांदण्याचा चुरा...

सत्यजित... जे न देखे रवी...
जणू रात्र काळी तिचे केस अन् पुरा चंद्र होता तिचा चेहरा... तिचे हासणे चांदण्याचा चुरा,तिचे लाजणे अमृताचा झरा! तिची चाल हंसापरी देखणी,कवीची म्हणू वा तिला लेखणी... तिच्या पाउली सांज रेंगाळते,तिच्या सोबती चालते ही धरा! चकाकून ओली उन्हे नाचती,जणू स्वप्नं पहिला ऋतू नाहती... तिचे दोन डोळे तिच्या पापण्या,किनारे जसे बांधती सागरा! कळ्या मोतियांच्या भरोनी पसा,तिने वेचता धुंद होते निशा... तिच्या ओंजळी गंध भारावतो,फुले रातराणीसवे मोगरा! मृगा लाविते केसरीचा लळा,कट्यारी नजर..पाहणे सापळा... अरे काय रंभा फिकी उर्वशी,फिक्या मेनका अन् फिक्या अप्सरा! —सत्यजित
वर्गीकरण
लेखनविषय:
22 टिप्पण्या 6,272 दृश्ये

Comments

पैसा नवीन

अतिशय सुरेख प्रतिमा आहेत एकेक!
एस नवीन

अतीव देखणी कविता! क्या बात है!!! शेवटच्या वाक्यात एक बदल सुचवतो, 'फिक्या मेनका अन् फिक्या अप्सरा!' ऐवजी 'फिकी मेनका अन् फिक्या अप्सरा!' असं करून पहा. मेनका एकच आहे. ऊर्वशी, रंभाप्रमाणे.
सत्यजित... नवीन

सर्व प्रतिसादक रसिकांचे मनःपूर्वक धन्यवाद!
प्रा.डॉ.दिलीप बिरुटे नवीन

कळ्या मोतियांच्या भरोनी पसा,तिने वेचता धुंद होते निशा... तिच्या ओंजळी गंध भारावतो,फुले रातराणीसवे मोगरा!
आवडल्या ओळी. -दिलीप बिरुटे
मितान नवीन

सुंदर !!!!!! ते सापळा तेवढं समजवून सांगा ना
सत्यजित... नवीन

अर्थ सहज आहे तसा... तिचे धारदार नजरेने पाहणे इतके मोहक असते की कुणाचीही नजर मिळताच,सापळ्यात अडकावा तसा तो गुंतून पडतो जणू काही एखाद्या सावजाने (मृगाने) खुद्द शिकाऱ्याच्याच (केसरी-सिंहाच्या) प्रेमात पडावे! शिवाय कुठलीही गजल रसिकाला स्वतःच्या संदर्भाने (अनुभव,इच्छा,कल्पना ई.) अर्थ लावण्याचे स्वातंत्र्य देते,ही तिची खासियत आहेच.हे अवांतर! प्रतिसादाबद्दल मनःपूर्वक धन्यवाद!
मदनबाण नवीन

पद्मावति नवीन

खुप सुरेख! हसण्याला चांदण्याचा चुरा ही उपमा प्रचंड आवडली.
सत्यजित... नवीन

मदनबाण,पद्मावतीजी,रेवतीजी...मनःपूर्वक धन्यवाद!