तिखटामिठाचे आप्पे आणि चटणी

साहित्य : एक वाटी तांदूळ, अर्धी वाटी हरभर्‍याची डाळ, पाव वाटी उडदाची डाळ, अर्धी वाटी कच्चे जाड पोहे, हिरव्या मिरच्या, आल्याचा छोटा तुकडा, पाव वाटी धूवून चिरलेली कोथिंबीर, दीड टेबलस्पून कच्च्या तेलाचे मोहन. कृती : आदल्या दिवशी तांदूळ व दोन्ही डाळी स्वच्छ धूवून पाण्यात भिजत घालव्यात. रात्री परत एकदा धूवून सरसरीत वाटून एकत्र करून उबेच्या जागी झाकून ठेवावे. दुसरे दिवशी आप्पे करायच्या वेळी जाड पोहे पाण्यात धूवून कुस्करून मिश्रणात घालावेत. मीठ, मिरची व आल्याचे वाटण घालावे. आवडत असल्यास कोथिंबीरीबरोबर थोडा कांदा व टोमॅटो बारीक चिरून पिठात मिसळावा. पिठात तेलाचे मोहन घालून ढवळून ठेवावे. गरम आप्पेपात्रात थोडे तेल घालून त्यावर डावाने पीठ ओतावे. आप्पेपात्राचा खळगा ७५% भरावा. झाकण ठेवून ५ मिनिटे खरपूस होऊ द्या. आता आप्पे उलटून पुन्हा थोडे तेल सोडावे. गरमागरम आप्पे नारळाच्या चटणीबरोबर वाढावेत. चटणीसाठी मिक्सरच्या भांड्यात ओला नारळ, कोथिंबीर, हिरव्या मिरच्या, एक छोटी पाकळी लसूण, किंचित आलं, मीठ, साखर व चार काजू घालून बारीक वाटावे. वरून गार झालेली बिन हळदीची फोडणी द्यावी. रेवती.