मराठी साहित्य, संस्कृती आणि लेखनाचे व्यासपीठ
प्रवेश करा | सदस्य व्हा
मिसळपाव

शरयत

आतिवास · · जनातलं, मनातलं
कथा
लेखनप्रकार
अनुभव
आज सकाळी साळा. कालच्याला अब्यास न्हौता, लई खेळ्ळो. तीन पायाच्या शरयतीत नुस्ती पडापड. तोंडात चम्चा अन चम्च्यात लिंबू ठिवून पळायचीबी येक शरयत. सोपी नसतीय. पन माजा पैला नंबर आला. आज साळंत झेंडा उबारला. समदी झ्याक ‘जनगणमन’ बोल्ली. कोणकी आजीबाई आलत्या, तेंनी कायबाय सांगितलं. समजलं नाय काय मला, तरीबी म्या टाळया वाजिवल्या. मंग बक्शीसं दिली. अंक्याला लब्बर, भान्याला पटटी. गुर्जीन्नी मला बोलिवलं. म्या आज्जीबाईच्या जवळ ग्येली. त्या म्हन्ल्या, “बाळ, तुला मोठेपणी काय व्हायचं आहे?” “शरयतवाली” म्या बोल्ली. त्या हसल्या. म्हन्ल्या, “आमचीही शर्यतच चालू आहे कधीपासून. सगळया मुलामुलींना शिकता यावं ही शर्यत.” म्हन्जे समदे नाय शिकले, तर आज्जीबाई शरयत हरणार? औघड हाये. * शतशब्दकथा
वाचने 15262 वाचनखूण प्रतिक्रिया 35

एस Sun, 01/25/2015 - 08:59
ते 'शरयत' पाहून मला वाटलं अफगाणिस्तानसंबंधीचा लेख आहे की काय. उघडल्यावर आंजीकथा आहे हा उलगडा झाला. ह्यावेळची इतकी भारी नाही, पण शेवट खास आतिवास स्टाइलने.

hitesh Sun, 01/25/2015 - 09:06
आजची आंजी उद्याची आज्जी असते

मंजूताई Sun, 01/25/2015 - 15:50
ते 'शरयत' पाहून मला वाटलं अफगाणिस्तानसंबंधीचा लेख आहे की काय. उघडल्यावर आंजीकथा आहे हा उलगडा झाला. ह्यावेळची इतकी भारी नाही, पण शेवट खास आतिवास स्टाइलने.+१

राही Sun, 01/25/2015 - 18:40
दिवसेंदिवस आंजीचे सवाल नेमके होत चाललेत. वाढत्या समजेचा परिणाम?

निमिष ध. Sun, 01/25/2015 - 21:09
आंजी आपल्या भावना खूप सुंदर रितीने व्यक्त करते! २६ जानेवारी आणि देशाचे भविष्य यांचा मस्त सांगड घातली आहे.

सुधांशुनूलकर Mon, 01/26/2015 - 12:38
छान लिहिलंय. अवांतर - +३ - मीही क्षणभर 'शरियत' असं वाचलं... तुमचं अफगाणिस्तान लेखन वाचल्याचा परिणाम असावा.

नाखु Tue, 01/27/2015 - 15:30
आंजी आणि आज्जी दोन्हीबी जितू दे आपल्या आप्ल्या शरयतीत काय!!

एस Tue, 01/27/2015 - 15:53
अशा शतशब्दकथांच्या शीर्षकात कथाप्रकाराचा उल्लेख असावा असे सुचवतो. उदा. 'शतशब्दकथा - शरयत'.

सविता००१ Tue, 01/27/2015 - 16:51
ही आंजी आपल्याला खुदकन हसवून लगेच लहानपणात घेउन जाते. छानच.