Skip to main content

लेखणीने लढाईस सज्ज व्हावे!

लेखक गंगाधर मुटे यांनी गुरुवार, 08/01/2015 या दिवशी प्रकाशित केले.
लेखणीने लढाईस सज्ज व्हावे!

आता तयार व्हावे लढण्यास लेखणीने
रक्षण अबोलतेचे करण्यास लेखणीने

अभ्यास चिंतनाला शास्त्रात घोळवावे
कसदार शब्दशेती फुलण्यास लेखणीने

वास्तव चितारण्याची अवगत कला करावी
भक्कम नवीन पाया रचण्यास लेखणीने

नवज्ञान निर्मितेला जेथे उभार तेथे
आशय हळूच न्यावा भिजण्यास लेखणीने

भाकड-वृथा कथांच्या कक्षेपल्याड जावे
अभिजात सृजनाला पुजण्यास लेखणीने

लटकी-पुचाट वाणी शिरजोर होत आहे
यावे रणात गच्ची धरण्यास लेखणीने

जेव्हा चहूदिशांनी वादळ विराट तेव्हा
द्यावे अभय दिव्याला जळण्यास लेखणीने

                             - गंगाधर मुटे 'अभय'
--------------------------------------------------

काव्यरस
अभय-गझल
मराठी गझल
लेखनविषय:
वाचने 12489
प्रतिक्रिया 27

प्रतिक्रिया

विटेकर गुरुवार, 08/01/2015
सोडून शेतकीचे आवेशपूर्ण गाणे! स्वीकारतोच आता शहरी काव्य-लेणे!! गाऊन दाखवीन असे सुरेल गाणे ! आता दिसेल तुम्हा साक्षात चांदणे !! नकोच खप्प मर्जी तुमच्या संपादकाची! पुरवीन आस आता गाऊन गाणी तुमची!! लागे न माळ आता शहरी प्रतिसादकाची ! मिळ्वीन पूर्ण खात्री माला आता कौतुकाची !! पुरेत हे प्रहार शिणलो प्रतिवाद करता! आता हवेत हार -साठी कवन करता !! मुटे कुल-सुताची ही स्वीकार मुक्त कविता! आवडेल नक्की तुजला थांबतो नक्की आता !! ओ मुटे , ह. घ्या , भांडायला येऊ नका !

अन्या दातार गुरुवार, 08/01/2015
तुमची कविता मी 'गे माय भू तुझे मी' च्या चालीवर म्हणून बघितली. ठिक बसतीये मीटरमध्ये :)

गंगाधर मुटे गुरुवार, 08/01/2015
गे माय भू तुझे मी हे राष्ट्र देवतांचे आणि ही गझल एकाच वृत्तात (आनंदकंद) आहे. त्यामुळे चाल समान आहे.

सतिश गावडे गुरुवार, 08/01/2015
अल्ताफ राजाच्या "तुम तो ठेहरे परदेसी" गाण्यातील "अब याद आ रहा हैं वो माहे जनवरी था" या चालीवरही परफेक्ट जमतंय.

आदूबाळ गुरुवार, 08/01/2015
याचा अर्थ "हे राष्ट्र देवतांचे" हे "या गो दांड्यावरना" या चालीतही म्हणता येईल! विटूकाका आणि इतरांची क्रिएटिविटी जबरदस्त आहे!

गंगाधर मुटे गुरुवार, 08/01/2015
@वैभव जाधव, "ये दिल मुझे बता दे, तू किस पे आगया है" या गीतात थोड्याफार मात्रा कमी जास्त आहेत पण या ओळींची जवळीक आनंदकद या वृत्ताशी आहे. :)

प्रसाद गोडबोले गुरुवार, 08/01/2015
मला वाटतय , मुटे सरांच्या मागील धाग्यातील प्रतिसादातील ज्ञानयज्ञामुळे पब्लिक इथे प्रतिसाद द्यायचं टाळतय , दुष्ट कुठले :-\ ह्यानिमिताने शेतकर्‍यांच्या कवितांना किमान ३० प्रतिसादांचे पॅकेज द्यावे असे मी संपादक मंडळाला आवाहन करीत आहे :D

कपिलमुनी गुरुवार, 08/01/2015
लेखकाचा प्रत्येक धागा वेगळी कलाकृती / लेखन म्हणून घ्यावा . बाकीच्या धाग्यांवरचे पडसाद इतरत्र नसावेत

प्रा.डॉ.दिलीप बिरुटे गुरुवार, 08/01/2015
सहमत....! कवितेवर प्रतिसाद अपेक्षित. बाकी मुटेंची रचना आवडली. -दिलीप बिरुटे

एस गुरुवार, 08/01/2015
नवज्ञान निर्मितेला जेथे उभार तेथे आशय हळूच न्यावा भिजण्यास लेखणीने
ह्या ओळी आवडल्या. पण कदाचित जिथे अशी अनुकूल परिस्थिती नाही तिथेही नव्या ज्ञानाच्या जोपासनेसाठी मशागत करणे हेही लेखणीचेच काम म्हटले पाहिजे. कविता छान आहे. पुलेशु.

आयुर्हित गुरुवार, 08/01/2015
अभिजात सृजनासाठी लागणाऱ्या मशागतीसाठी शुभेच्छा.

वेल्लाभट शुक्रवार, 09/01/2015
वा वा वा वा ! जाम आवडली ! क्या बात ! सहीच.....