मराठी साहित्य, संस्कृती आणि लेखनाचे व्यासपीठ
प्रवेश करा | सदस्य व्हा
मिसळपाव

टकाटक

आतिवास · · जनातलं, मनातलं
कथा
शिक्षण
लेखनप्रकार
आस्वाद
अनुभव
परारथना झाली की हजरी घेतेत गुर्जी. घरी बसलेल्यांना पकडून आणाया पोरास्नी पळवत्यात. कंदी कामं असत्यात. तळ्यावरनं पाणी आणा; अंगण झाडा; फळा काळा करा. गमभन लिऊन झालं की पाडे. लंबरपरमानं येकेकाला हुबा करतेत. तेनं वरडायचं, “येक रे ..” की आमी “येकाचा”. धापत्तुर. मंग “येकावर येक अकरा”. पन्नासपत्तुर. गुर्जी येकदम बायेर. च्या प्यायाला, तमाकू खायाला. रोजला तेच. म्या पेंगाया लाग्ली. मंगली वराडली, “आन्जे, पाडे म्हन, नायतर गुर्जीस्नी नाव सांगते बग”. शिवाजीम्हाराज समजतेय सोताला. मंगली वराडली, “साहा रे” म्या हळूच “आटाचा” बोल्ली. कुणाला कायबी नाय समजलं. मंगली, “येकावर चार” म्या, “पंचेईस” समद्यांच्यात कायबी म्हन्लं तर चालतंय – फकस्त हळू म्हनायचं. म्या जागीच झाली. टकाटक. *शतशब्दकथा*
वाचने 12592 वाचनखूण प्रतिक्रिया 27

धर्मराजमुटके Mon, 10/21/2013 - 23:05
शतशब्दकथा बास जाली की ताई ! म्ह्जी तुमी पायवाट दावली. बाकीचे त्यावरुन चालतील आणी रस्ता बनलं. आता नवीन कायतरी फारम्यॉट आणा की ! जमलं तर ते पयल्यासारखे सबेचे रपट लिवा की ! लै ग्वाडं लागतात वाचाया !

आतिवास Tue, 10/22/2013 - 13:59
शाळा ते कामगार सभा कुठेही हा फंडा वापरा... हं! हे नव्हतं लक्षात आलं माझ्या कधी :-)

स्पंदना Tue, 10/22/2013 - 04:22
त्याच अस हाय बगा, ह्या आंजीन शिकशनाची बराबर नसच पकडल्या बगा, म्हंजे साळत कशासाटन जायाच? शान व्हाया, एव्हार कळाया म्हनुनच कनी? मग आता ही शानी बी व्हाल्या, आन एव्हारबी कळतोया. एकून साळा जे शिकवायच त्ये शिकवाया लागली तर. अतिवासताई त्या आंजीचा माज्याकडन एक गालगुच्चा घ्ये ग!

आतिवास Tue, 10/22/2013 - 14:01
अपर्णाताई, बघते तुमचं काम करायला जमतंय का ते :-) बाकी 'शाळा जे शिकवायं ते शिकवायला लागली तर' या भावनेशी सहमती.

आतिवास Tue, 10/22/2013 - 14:06
'टकाटक' या शब्दाचा प्रचलित किंवा/आणि आंतरजालीय अर्थ काय आहे याविषयी मी अनभिज्ञ आहे :-) पण तुमच्या प्रतिसादावरुन हा शब्द आंजीच्या निरागसतेला न शोभणारा आहे असं तुम्हाला वाटलं हे स्पष्ट होतंय. समर्थन नाही. पण कदाचित आंजीने हा शब्द 'झोप सगळी उडून गेली (नवी गंमत कळल्याने)' - इतक्याच मर्यादित अर्थाने वापरला असावा इथं :-)

पैसा Mon, 10/28/2013 - 16:07
मस्तच! * वर "टकाटक" या शब्दाबद्दल चर्चा जरा वाचली. "टक्क जागी झाली" किंवा "टकटकीत जागी झाली" असा शब्दप्रयोग माहित आहे.

आतिवास Tue, 10/29/2013 - 16:37
आज "टकाटक" शब्द प्रत्यक्ष ऐकला (पुन्हा एकदा). अनोळखी भागात दुचाकी पंक्चर झाली. मग समोर दिसलेल्या दुकानात गेले. त्याने अर्धा तास काही काम केलं. निघताना मी म्हटलं, "व्यवस्थित केलं आहे ना सगळं?" त्यावर तो माणूस म्हणाला, "एकदम टकाटक झालंय, काळजीचं काम नाही काही ...." :-)

गवि Tue, 10/29/2013 - 16:59
जस्ट टू अ‍ॅड टू द लिस्ट.. तव्यावर केलेल्या ठराविक रेसिपीजना टकाटक म्हणतात. मुंबईत तर या रेसिपीज फेमस आहेत. खडा पावभाजीसदृश. उदा. तवा सीफूड टकाटक, तवा सब्जी टकाटक, तवा पनीर टकाटक नमुना इथे