Skip to main content

नैवेद्य १) मोदक

लेखक जागु यांनी सोमवार, 08/08/2011 या दिवशी प्रकाशित केले.
प्रथम वंदनिय गणपती म्हणुन गणपतीच्या मोदकाने सुरुवात करत आहे. तसे आमच्याकडे नागपंचमी ह्या पहिल्या श्रावणातल्या सणालाच नागोबाच्या नैवेद्यासाठी मोदक करण्याची प्रथा आहे. साहित्य तांदळाचे पिठ मिठ १ ओला नारळ खरवडून गुळ खसखस चारोळी/काजु/आक्रोड/मनुका वेलची/केसर तुप पाककृती तापलेल्या भांड्यात तुप टाकुन खसखस घाला. आता त्यावर गुळ घाला व मंद गॅसवर वितळू द्या. गुळवितळला की लगेच खोबर व चारोळी/काजु/आक्रोड/मनुका/बदाम पैकी काही आवडत असेल ते घाला किंवा जे घरात असेल ते थोडे थोडे घाला. थोडा वेळ परतुन गॅस बंद करा. आता १ ते दिड ग्लास पाणी घेउन त्यात मिठ टाकुन गरम करण्यासाठी ठेवा. आता पाणी उकळायच्या आधी जे भांड्याच्या तळातुन बुडबुडे यायला लागतात तेंव्हा तांदळाचे पिठ अंदाजे टाकत ढवळा व लगेच गॅस बंद करा म्हणजे मोदक वातड होत नाहीत. जास्त पिठ टाकु नका. पिठ ओलसर राहील एवढेच टाका. पिठ परातीत काढा व थोडे थंड झाले की पाण्याने मळायला घ्या. जास्त पाणी लावु नका. हलकेच हात भिजेल एवढेच घेत रहा व चांगले मळून घ्या. आता मोदक करायला घेताना परत थोडे पिठ जरा मळा व लिंबाएवढा गोळा घेउन त्याची पातळ वाटी करा. वाटीत तळाला नारळाचे सारण भरा. आता वाटीच्या बाहेरच्या बाजुला दुमडत कमी अंतरावर कळ्या करा. मग वाटीच्या वरच्या भागाच्या कळ्यांना हलके आतल्या बाजुला गोल गोल फिरवत वरच्या दिशेने जुळवा. टोकाची शेंडी टोकदार करा. आता हे मोदक २० ते ३० मिनिटे मोदक पात्रात वाफवुन घ्या. मोदकांबरोबर आमच्याकडे करंज्या (शिंगर्‍या) व खापट्या (पिठाची चपटे गोल) करण्याची पद्धत आहे. अधिक टिपा : उकळवणी घेताना काही जणं पाण्याबरोबर दुध किंवा तेलही घालतात. वाटी वळताना काही जणं ती पातळ होण्यासाठी हाताला तेल लावतात. मी नेहमी पाणीच वापरते. मोदकाच्या सारणात आक्रोड जास्त चांगला लागतो हा माझा अनुभव आहे. साखरचौतीच्या गणपतीला नारळाच्या सारणात गुळाऐवजी साखर घालतात. (नागपंचमीच्या दिवशी ऑफिसला जायच्या घाईमुळे सगळे फोटो काढू शकले नाही त्याबद्दल क्षमस्व. पण परत केल्यावर सगळे फोटो इथे लोड करण्याचा प्रयत्न करेन.)
वाचने 9667
प्रतिक्रिया 29

प्रतिक्रिया

गणपा सोमवार, 08/08/2011
कसले खत्तर्नाक दिसत आहेत मोदक. काय त्या एका सारख्या एक कळ्या.. जणु साच्यातुनच काढले आहेत. हॅट्स ऑफ तुला. :)

चित्रा सोमवार, 08/08/2011
+१. फारच सुरेख. खापट्यांना (चपट्या गोळ्यांना) निवगर्‍या असेही म्हणतात. त्या करणे जालीम सोपे आहे, असे मोदक जमणे महाकठीण :) तेव्हा खरेच हॅटस ऑफ.

निमिष ध. सोमवार, 08/08/2011
वाह .. किती सुंदर फोटो आहेत. एकदम गणपतीत घरी असल्यासारखे वाटले. पानात मोदक आणि तुपाची धार. खास मोदकांसाठी गणपतीची वाट पाहणे असायचे ... सध्या नुसते फोटोंमध्ये दर्शन.

अभिज्ञ सोमवार, 08/08/2011
सुंदर मोदक! इतके एकसारखे!!! बापरे!! तू ग्रेट आहेस. अगदि अगदि. ह्या एकसारख्या मोदकांकरिता १००/१०० मार्कस. अभिज्ञ.

निवेदिता-ताई सोमवार, 08/08/2011
आता १ ते दिड ग्लास पाणी घेउन त्यात मिठ टाकुन गरम करण्यासाठी ठेवा. आता पाणी उकळायच्या आधी जे भांड्याच्या तळातुन बुडबुडे यायला लागतात तेंव्हा तांदळाचे पिठ अंदाजे टाकत ढवळा व लगेच गॅस बंद करा म्हणजे मोदक वातड होत नाहीत. ------------------------------------------------------- हे बरे सांगितलेस...नाहीतर आम्ही उकड काढताना पाणी पुर्ण उकळून घेत होतो,आता असेच करुन पाहिन... येउदेत अजुन बाप्पासाठी नेवैद्य....

सूड सोमवार, 08/08/2011
ही टीप खरोखरच चांगली आहे, मागच्या वेळी जागुतैची ही टीप वापरुन सकाळी १० वाजता केलेले मोदक संध्याकाळी पाच वाजेपर्यंत जसेच्या तसे मऊ होते. आणि हो जागुतै, मुखर्‍या अगदी झकासच साधल्यात फोटोतल्या मोदकांच्या !!

सहज सोमवार, 08/08/2011
वरील सर्वांशी सहमत!

गवि सोमवार, 08/08/2011
क्या बात है. इतके रेखीव आणि एकसारखे मोदक पहिल्यांदाच पाहिले. जबरदस्त.. गणपतीपुळ्याला गुरुजींच्या पडवीत बसलोय असा भास झाला.

इरसाल सोमवार, 08/08/2011
असे मोदक मी फक्त आईने बनवलेले खाल्लेत. सेम टू सेम जागुताई ने बनवलेत.जागुतैला त्रिवार सलाम. मोदक खावून जवळपास दशक उलटले. पांढरा शुभ्र भात (झिनी कोलम), बिरड्याची भाजी सोबत तोंडलीची भजी आणि मोदक (आणखी काय पाहिजे ?) केव्हा येवू मोदक खायला ?

नन्दादीप सोमवार, 08/08/2011
जागुताई, मोदक मस्त झाले आहेत. .....तों.पा.सु. मोदकाच्या कळ्या (पाकळ्या) अप्रतिम......

प्रचेतस सोमवार, 08/08/2011
जागुतै, मोदक एकदम सुंदर. अवांतरः त्याबरोबर त्या तिखटमिठाच्या निवरग्या का काय म्हणतात ना त्या कशा करायच्या हे पण सांगा ना.

स्वाती दिनेश मंगळवार, 09/08/2011
जागु, मोदक एकदम सुबक आणि रेखीव दिसत आहेत ग, मस्तच! वल्ली,निवरग्या नव्हे निवगर्‍या. निवगर्‍या- निवगर्‍या करताना मोदकासाठीची उकड काढतो तशीच उकड काढायची, त्यात जिरे+मिरचीचे वाटण करुन घालायचे व मीठ घालायचे. किवा तिखट+मीठ+ जिरे घालायचे. आणि त्याचे वडे थापायचे व ते मोदकांसारखे उकडायचे. घंटोळी/सिध्दलाडू- हीच उकड घेऊन वडे थापण्याऐवजी कडबोळ्यासाठी करतो तशी लांब सुरळी करायची आणि एक गाठ मारुन बो सारखा आकार द्यायचा. व ही घंटोळी किवा सिध्दलाडू उकडायचे. गोड मोदकांबरोबर मध्येच एखादी तिखट निवगरी किवा घंटोळे मजा आणते. (लाडूच्या आकाराशी काहीही साधर्म्य नसूनही सिध्दलाडू का म्हणतात ते मात्र माहित नाही.) स्वाती

चित्रा बुधवार, 10/08/2011
आमच्या घरी निवगर्‍यांमध्ये कोथिंबीरही घालतात.

पल्लवी सोमवार, 08/08/2011
_/\_

स्मिता. सोमवार, 08/08/2011
आई शप्पथ! कसले सुरेख मोदक आहेत. सर्व मोदक आणि त्यांच्या कळ्या किती एकसारख्या असाव्यात! ते मोदक बघून त्यातला एक पटकन उचलून, त्याला फोडून वर साजूक तूप घालून खावासा वाटतोय.

Mrunalini सोमवार, 08/08/2011
खुपच सुंदर.... त्या मोदकांच्या कळ्या किती सुरेख आल्यात.... मला तर अशा कळ्या पाडताच येत नाहीत.. त्यामुळे मी मोदक साच्यातुन करते... एवढे सुरेख मोदक करतेस म्हणजे माणले पाहिजे तुला... :)

विशाखा राऊत सोमवार, 08/08/2011
जागुताई तुला साष्टांग दंडवत..

कच्ची कैरी सोमवार, 08/08/2011
वा जागुताई तुझ्या एकापेक्षा एक पाककृती वाचुन धन्य झाले मी ! आणि आता रेसेपीबद्दल काय बोलु मी ?सर्वांनीच इतकी तारिफ केलीय कि माझ्याकडे शब्दच नाहित तुझी स्तुती करायला .