चैत्रगौर

चैत्रगौरीचं हळदीकुंकू करायचंय, सगळ्या सुगरण ताया स्वैपाकघरात गुन्तल्या, तेव्हा म्हटलं, आपण लिम्बू-टिम्बू कंपनीनं गौर सजवावी. पहा आवडतेय का! गाई कोकीळ भूपाळी सखे तुझ्या स्वागताला इंद्रधनूचे तोरण शोभे तुझ्या गाभा-याला घाल रात्रीचे काजळ, माळ वेणीत चांदणे चंद्रकोरीची काकणे, दंवबिंदूंची पैंजणे सोनसळीचा पदर, सांजरंगाची पैठणी गर्भरेशमी आभाळशेला पांघर साजणी सूर्यकिरणांनी रेख भाळी कुंकवाची चिरी गळा नक्षत्रमण्यांची माळ खुलू दे साजिरी गो-या तळव्याला लाव चैत्रपालवीची मेंदी कर आकाशगंगेला तुझ्या भांगातली बिंदी रूपलावण्य हे तुझे, जशी मदनाची रती ओठांवरी उगवती, गालांवरी मावळती जाईजुईचा मांडव, त्यात चंदनाचा झूला ये ग सये चैत्रगौरी, सख्या झुलविती तुला