Skip to main content

असेलही वा नसेलही...

लेखक प्राची अश्विनी यांनी मंगळवार, 16/10/2018 या दिवशी प्रकाशित केले.
असेलही वा नसेलही... दोनच या शब्दांवर सारे जगणे अपुले वसेलही... धर्मच गेला देऊन उत्तर शाश्वत वैश्विक प्रश्नाचे. परी न विसरू शकला डोळे कधीच नंतर द्रोणाचे. मनात त्याच्या खंत तयाची रुतून बसली असेलही.... असेलही वा नसेलही दोनच या शब्दांवर सारे जगणे अपुले वसेलही... डोळ्यांमध्ये प्राण आणुनी कुणी विचारी आज तिला, पहा बदललो पुरा राणि मी आवडेन का अता तुला? हसून उत्तर टाळू जाता नयनी पाणी नसेलही... असेलही वा नसेलही दोनच या शब्दांवर सारे जगणे त्यांचे वसेलही...
काव्यरस
भावकविता
लेखनविषय:
वाचने 10338
प्रतिक्रिया 35

प्रतिक्रिया

श्वेता२४ मंगळवार, 16/10/2018
मस्त कविता अतिशय आवडली

चांदणे संदीप मंगळवार, 16/10/2018
कविता आवडली! Sandy

अभ्या.. मंगळवार, 16/10/2018
असेलही वा नसेलही हीच कहाणी प्रत्येकाची शब्द वेगळे, वेळ वेगळी प्रत्येकाची व्यथा आगळी कुण्या चुकीची जाणीव कुणाला असेलही वा नसेलही.... असेलही वा नसेलही दोनच या शब्दांवर सारे जगणे त्यांचे वसेलही...

अनन्त्_यात्री मंगळवार, 16/10/2018
कविता आवडली!

राघव बुधवार, 17/10/2018
अत्यंत सुंदर! खूप आवडले! :-)

माहितगार शुक्रवार, 19/10/2018
चांगली रचना, अर्थात काव्याचा काही भाग समजून घेणे माझ्या बाबतित अद्याप बाकी असावे असे वाटते, पुर्नवाचनात अधिक अर्थ काही लागू शकल्यास बघता येईल. पु.ले.शु.

चित्रगुप्त शुक्रवार, 19/10/2018
कविता आवडली, माहितगार म्हणतात त्याप्रमाणे मलाही संपूर्ण अर्थ उलगडलेला नाही. थोडेसे दिशादर्शन केल्यास उपयोगी ठरेल.

प्राची अश्विनी शुक्रवार, 19/10/2018
The truth is not absolute. त्याला(कमीतकमी) दोन बाजू असतात. असं काहीसं म्हणायचं होतं. To be or not to be हा एक शाश्वत प्रश्न आहेच. द्रोणाने विचारलेल्या "अश्वत्थामा मेला का " या प्रश्नाला प्रत्यक्ष धर्माने ( pun intended) सुद्धा नरो वा कुंजरो वा असं गुळमुळीत "असेलही किंवा नसेलही या अर्थाचं उत्तर दिलं. आणि म्हणून द्रोण खचला आणि त्याला मारणं शक्य झालं. हा संदर्भ घेतलाय

माहितगार शुक्रवार, 19/10/2018
डोळ्यांमध्ये प्राण आणुनी कुणी विचारी आज तिला, पहा बदललो पुरा राणि मी आवडेन का अता तुला? हसून उत्तर टाळू जाता नयनी पाणी नसेलही...

प्राची अश्विनी शुक्रवार, 19/10/2018
पहिल्या कडव्याशी लिंक नाही, मूळ कल्पनेशी आहे. भातुकलीच्या खेळामधली ....आठवतंय? काही वर्षांनंतर ते राजा राणी पुन्हा भेटले तर??? आता ते कडवं वाचा.. राणीने उत्तर टाळलंय.

माहितगार शुक्रवार, 19/10/2018
ओह, आता अर्थ लागतोय आणि आता कविता पोहोचली असे नक्कीच म्हणता येते, न कळलेला काही अधिक खोल अर्थ असावा असे वाटतच होते पण नेमका काय असेल हे समजत नव्हते. चांगली विचारात पाडणारी रचना . पु.ले.शु.

चित्रगुप्त शुक्रवार, 19/10/2018
जै धर्मात ज्याला 'स्यात' ( .. हिंदीतील 'शायद ?)म्हणतात ते हेच असावे. असेही असेल किंवा तसेही असेल, अंतिम सत्य म्हणून काहीही सांगता येत नाही.... वगैरे. यावर ओशोंचे खूप छान प्रवचन पूर्वी वाचले होते.

प्राची अश्विनी शुक्रवार, 19/10/2018
स्यात.. ही नवीन माहिती मिळाली.

नाखु शुक्रवार, 19/10/2018
आवडली. असेल ही नसेल ही च्या अधेमधे वावरणारा नाखु पांढरपेशा

डॉ सुहास म्हात्रे शुक्रवार, 19/10/2018
सुंदर कविता ! यादृच्छिकपणा आणि अनिश्चितता यांच्यावरची टिप्पणी आवडली. जीवन हे नेहमी 'असेलही-नसेलही'च्या हिंदोळ्यावर झुलत असते... खात्री (असलीच तर,) फार कमी गोष्टींची आणि तीही फार कमी वेळा असते. पण, त्यामुळेच, जीवनात मजा आहे.

ज्ञानोबाचे पैजार शनिवार, 20/10/2018
कविता लै म्हणजे लैच आवडली बर्‍याच दिवसांनी अशी कविता वाचायला मिळाली की जी पहिल्या वाचनात आवडून गेली. (कवीने / कवयत्रीने १० वीच्या परीक्षेत सुध्दा संदर्भासहीत स्पष्टीकरणाचा प्रश्र्ण सोडवू नये, कविता पुन्हा पुन्हा वाचण्यात जी मजा असते ती त्याने कमी होते, असे आपले माझे मत आहे) पैजारबुवा,

प्राची अश्विनी शनिवार, 20/10/2018
पटेश!;)

खिलजि सोमवार, 22/10/2018
सुंदर कविता , अभ्याशेठचे सुंदर शब्दांत निरूपण आणि त्याबरोबर कवितेवर झालेले विवेचन , सारं काही सुंदर .. छान भट्टी जमून आलीय .. दुग्धशर्करा योग

चिगो मंगळवार, 23/10/2018
भावपुर्ण कविता.. आवडली. अवांतर : शिर्षक वाचूनच डोक्यात भीमराव पांचाळेंनी गायलेली 'तुझा तसाच गोडवा... असेलही, नसेलही'ही गझल झरायला लागली..