पॉश अँड चिक आणि मी

हेअर कटिंग सलून मध्ये जाऊन केस कापून येणे हे माझे अत्यंत आवडते काम आहे. एखाद्या रविवारी निवांत उठून सावकाश अप्पाच्या "स्टाईल हेअर कटिंग सलून" मध्ये जाऊन बसावे. टीव्ही वर लावलेली निर्थथक गाणी पाहावी किंवा व्हाट्सअँप वर ज्ञानवर्धक माहिती वाचावी. आपला नंबर आला की आपले डोके अप्पाच्या हाती देऊन टाईमपास गप्पा माराव्या आणि हेड मसाज घेऊन डुलत डुलत घरी यावे हा माझा आवडता उद्योग आहे. 
एके दिवशी माझ्या पत्नीला कुठून कुणास ठाऊक पण पॉश अँड चिक नावाच्या लग्झरी सलूनचे कुपन मिळाले आणि ते नेमके पुरूषांच्या केशकर्तनाकरिता होते. पत्नीने प्रेमाने दिलेल्या ह्या भेटीचा अव्हेर करणे मला शक्य नव्हते आणि जड अंतःकरणाने मी तिथे जायला तयार झालो. "आधी अपॉइंटमेंट घेऊन मगच जा. ते काही तुझ्या न्हाव्याचे दुकान नाहीये" अशी कडक सूचनाही मिळाली. 
अपॉइंटमेंट घेण्याकरिता फोने लावला तर पलीकडची बाई चक्क इंग्लिश मध्ये बोलू लागली. 
"Good Morning Sir! Welcome to Posh and Chic Salon. How can I help you"
"Good Morning! I my have appointment?"
"which  is your preferred location and date sir?"
"Pimple Saudagar for today"
"Sorry Sir! We are fully booked for today. Can you give me some other date Please?"
आमच्या अप्पाकडे कधी अपॉइंटमेंट घेऊन जाण्याची मला गरज पडली नव्हती. "अप्पा, किती वेळ लागेल?" असे विचारले की तो "१५ मिनिट" असे ठरलेले उत्तर द्यायचा. फार गर्दी असेल तर लाकडी बाकड्यावर दाटीवाटीने बसायचे, तिथे ठेवलेल्या मुंबई चौफेर किंवा संध्यानंद असल्या वृत्तपत्रातील "तरुण स्त्रिया प्रौढ पुरुषांकडे का आकर्षित होतात?" अथवा "दोन डोक्याचे घुबड स्वप्नात दिसले तर त्याचा अर्थ काय असतो?" असले अभ्यासपूर्ण  लेख वाचायचे की थोड्या वेळात नंबर येतो. "some other date" ची भानगड नसते. असो.
अपॉइंटमेंटचे सोपस्कार पूर्ण केले. अपॉइंटमेंटच्या आधी दोन दिवस मला खूप टेन्शन आले होते. माझ्या टीम मधल्या श्रीनिवास अरुमुगम ह्यालाही ते जाणवले. मी Posh and Chic नावाच्या सलून मध्ये जाणार आहे हे कळल्यावर त्याच्या चेहेऱ्यावर मंद स्मित पसरले. "Very good salon sir. You must go." असे त्यानेही आग्रहाने सांगितले. "I also go there". आता हा अरुमुगम, कटाप्पाला भरगच्च केस आल्यावर तो जसा दिसेल, तसा दिसतो. हा लग्झरी सलून मध्ये जातो? "Both my girlfriend and me goes there." म्हणजे ह्या केशूभाई कटाप्पाला गर्लफ्रेंड आहे? च्यायला ह्या सलून मध्ये गेलेच पाहिजे. "मस्त बहारों का मै आशिक" असे गात मी झाडाभोवती नृत्य करत आहे आणि सोनेरी केसांची एक नवतरुणी माझ्या भोवती पिंगा घालत आहे असली स्वप्ने मला पडू लागली.
अखेर तो दिवस आला. त्याआधी मला एक दोन रिमाइंडरचे फोन सुद्धा येऊन गेले. अपॉइंटमेंटच्या बरोबर ५ मिनिट आधी मी तेथे पोहोचलो. एका सुबक रिसेप्शनिस्टने माझे स्वागत केले. तुम्हाला पुरुष हेअर स्टायलिस्ट हवा आहे की लेडी? असेही विचारले. मी लेडी असे उत्तर देणार होतो पण त्याच वेळी तिथे केशुभाई कटप्पा आणि त्याची प्रेयसी अली तर माझी नाचक्की व्हायची ह्या भीतीने पुरुष असे उत्तर दिले. "ठीक आहे सर, हेअर एक्सपर्ट आयुष थोड्याच वेळात तुम्हाला अटेंड करतील". थोड्या वेळात तिशीच्या एका युवकाने मला नम्रपणे एका खुर्चीत बसायला सांगितले आणि अतिशय नाजूकपणे माझ्याभोवती एक टॉवेल गुंडाळला. शेजारच्या खुर्चीत एका स्त्री विराजमान झाली होती. तिच्या चेहेऱ्यावर निळ्या रंगाचा लेप लावला होता. अंगात निळ्या रंगाचा गाऊन होता आणि केसांना निळ्या रंगाची चादर गुंडाळली होती. त्यामुळे ती इसापनीती मधल्या निळ्या कोल्ह्यासारखी दिसत होती. आयुषने माझ्या केसातून दोन तीन वेळा नुसताच हात फिरवला. "सर, लास्ट टाइम शाम्पू लावून आंघोळ कधी केली होती?" "परवा". माझ्या लेखी परवा ह्या शब्दाचा अर्थ पूर्वी कधीतरी असा होतो. "कुठला शाम्पू वापरता?" आता अली का पंचाईत? मी खरे तर अंगाचा साबणच केसांना फासतो. पण लग्झरी सलून मध्ये असे उत्तर चालणार नाही त्यामुळे "क्लिनिक प्लस" असे मी उत्तर दिले. "सर, कोणताही शाम्पू वापरून चालत नाही. केसांचे टेक्श्चर आणि स्कॅल्प कसा आहे त्यावरून शाम्पू चूझ करायचा असतो." हे ऐकून तो शेजारचा निळा कोल्हा उगाच हसला. 
“आम्ही फक्त लो-रिॲलचे प्रोफेशनल ग्रेड शाम्पूचा रेकमेंड करतो सर. आणि शाम्पू नंतर कंडिशनर मस्ट आहे. आमच्या सलून मध्ये मिळतील. १२०० पासून रेंज सुरु होते.“ त्याने महागडी उत्पादने विकण्याचा निष्फळ प्रयत्न केला.
त्यानंतर त्याने माझ्या केसाना बायका लावतात तसल्या पिना लावल्या. त्यामुळे माझा चेहेरा काटे पिंजारलेले साळींदरासारखा दिसू लागला. 
"तुम्हाला कशी स्टाईल हवी आहे?" 
"नॉर्मल चालेल". 
"थोडा प्रोफेशनल लुक दिलेला चालेल का? तुम्ही काम कुठे करता?" 
"IT मध्ये" मी अभिमानाने सांगितले. 
"अच्छा. प्रोफेशनल लुक देऊया. कुठली कंपनी?" 
"कुर्लासॉफ्ट." मी परत अभिमानाने उत्तर दिले. 
"ओके. म्हणजे फार प्रोफेशनल लुक ची गरज नाहीये. इंटरनॅशनल कंपनी असती तर गोष्ट वेगळी होती." 
निळा कोल्हा पुन्हा एकदा हसला. 
"सर, तुमचा स्कॅल्प खूप ड्राय आहे आणि केस क्राऊन भोवती कमी होऊ लागले आहेत. केसांचे टेक्श्चर खूप खराब झाले आहे अँड थोडे केस काळे राहिले आहेत बाकी सगळे पांढरे झाले आहेत. तुम्ही ऑफिसला कसे जाता?" 
"बाईक वरून"
"अच्छा. कार नाहीये का?"
निळा कोल्हा हसला. 
"कार आहे, पण मला बाईकचा शौक आहे." मी उगाच बढाई मारली.
"कोणती बाईक?" हेअर एक्स्पर्ट माझा पिच्छा काही सोडत नव्हता.
मी "स्कुटी पेप" असे सांगणार होतो पण निळ्या कोल्ह्याला हसण्याची संधी मला द्यायची नव्हती. त्यामुळे "रॉयल एनफिल्ड" अशी थाप मी मारली. निळ्या कोल्ह्याच्या चेहेऱ्यावर "हे येडंबिद्र एनफिल्ड चालवतं?" असा भाव स्पष्ट दिसत होता.
"सर, एक सजेशन आहे. हेल्मेट वापरा आणि हेल्मेटच्या आत एक कपडा गुंडाळा. म्हणजे हेअर डॅमेज होणार नाही आणि स्कॅल्प ड्राय होणार नाही."
"ओक"
"सर, हेअर कलर लावायचा का? म्हणजे सॉल्ट पेपर लुक येईल?
"काय?"
"सॉल्ट पेपर लुक. सध्या खूप ट्रेंडिंग आहे."
"नको, सध्या फक्त केस कापा." मी काकुळतीची विनवणी केली.
मग त्याने एक एक केस वैयक्तिकरित्या अतिशय नाजूकपणे कापायला सुरुवात केली. 
"लास्ट टाइम कुठे हेअर कट केला होता?"
“अप्पाकडे” असे अगदी माझ्या ओठांवर आले होते पण निळ्या कोल्ह्याकडे एक डोळा ठेवून मी "हबीब्स मध्ये" असे उत्तर दिले.
"सर, डोन्ट माईंड, पण हबीब्स चे काय झाले आहे ना की भरपूर ब्रॅंचेस त्यांनी ओपन केल्या आहेत आणि त्यामुळे त्यांची क्वालिटी डिग्रेड झाली आहे. आता तुमचेच केस पहा ना, उंदरांनी कुरतडल्यासारखे कट केले आहेत."
निळ्या कोल्ह्याला असुरी आनंद झाला. ती बया जोरजोरात हसू लागली. अयुषही आपण लै भारी जोक मारल्यासारखा हसू लागला. 
"तरीही मी तुमच्या केसांना बेश्ट लुक दिला आहे. एकदा चेक करा."
"अजून जरा बारीक केले तरी चालतील"
"नाही सर, अजून बारीक केले ना तर केसांचा बाउन्स जाईल"
"काय?"
"बाउन्स सर! त्यामुळे केस लाइव्हली दिसतात. तुमचे केस लाइफलेस आणि तुमची केस होपलेस आहे.“ त्याने उगाच फालतू विनोद केला. शेजारची नीलसुंदरी दात विचकून हसली. चेटकिणीसारखे दात होते भवानीचे. “तुम्हाला सलूनच्या नाही तर Dentist च्या खुर्चीत बसायची गरज आहे" असे सांगण्याचा मोह मी आवरला.
“यंग आणि स्किनी चेहेऱ्याला बारीक केस सूट करतात पण तुमचा फेस तेवढा यंग नाहीये आणि चबी आहे त्यामुळे हीच स्टाईल तुमहाला त्यातल्या त्यात बरी दिसते"
निळ्या कोल्ह्याला आता तर हर्षवायू झाला होता. 
झाला तेवढा अपमान पुरे असे म्हणून मी त्या हॉट सीट वरून खाली उतरलो आणि निमूटपणे पैसे भरायला गेलो.
"सर, कसा होता एक्सपीरियन्स?"
"बिल किती झाले?'
"सर, तुमचे ना ३४४ रुपीज झाले इन्कलुडींग GST."
"इतके? माझ्याकडे डिसकाउन्ट कूपन आहे."
"हो सर, डिस्काउंट पकडूनच ३४४ झाले आहेत. नाहीतर नॉर्मल हेअरकट कॅन कॉस्ट मोअर दॅन फाईव्ह हंड्रेड"
अबब! मी गपगुमान पैसे दिले. 
"सर तुम्हाला ॲन्न्युअल मेम्बरशिप घ्यायची आहे का? फक्त १४९९ ला आहे आणि प्रत्येक सर्व्हिस वर २०% ऑफ मिळेल."
"नको!" मी अक्षरशः पळतच बाहेर पडलो.
पुढील वेळी शांतपणे अप्पाचे दुकान गाठले. 
"अप्पा, किती वेळ लागेल?"
नेहमीप्रमाणे उत्तर आले "पंधरा मिनिट."
त्या दोन शब्दांत मला असा मानसिक आधार मिळाला, जो Posh and Chic च्या पाचशे रुपयांच्या हेअरकटमध्ये, प्रोफेशनल लुकमध्ये, सॉल्ट अँड पेपरमध्ये, स्कॅल्प ॲनालिसिसनध्ये मिळाला नव्हता.
आजही अप्पाकडे गेलो की तो काही विचारत नाही.
‘स्कॅल्प ड्राय आहे का?’
‘टेक्स्चर कसं आहे?’
‘कार की बाईक?’
‘रॉयल एनफिल्ड की स्कुटी?’
‘सॉल्ट अँड पेपर लुक करू का?’
काहीच नाही.
सरळ एकच प्रश्न "नेहमीसारखंच ना?"
आणि मीही म्हणतो "हो अप्पा. नेहमीसारखेच"