गझल संध्याकाळची वेळ . मोठं रोमँटिक वातावरण ! बाहेर मुसळधार पाऊस. धरतीशी लडिवाळ नाही तर जोरकस सलगी करणाऱ्या आषाढसरी ! त्या सभागृहात कार्यक्रम रंगात आला होता . गझलांचा कार्यक्रम. शांतपणे ,आतल्या अगदी आतल्या जखमा कुरवाळणारा . तुडुंब गर्दी होती. त्यातही तरुणाईची खरी गर्दी . बाकी थोडीफार पिकली पानं होती ; पण ती घरी वेळ जात नाही म्हणून आलेली . कारण तसंच होतं ना. कार्यक्रम शामकुमारचा होता . तरुण , राजबिंडा ,नवोदित गझल गायक . पण तयारी अशी की पार बुजुर्ग वाटावा . त्यामुळेच तर गर्दी होती आणि तरुण मुलांची जास्त अन हो मुलींचीही . असतं वय एखाद्यावर जीव टाकायचं . येड लागायचं . एखादी अप्राप्य गोष्ट म्हणल्यावर तर पोरी जास्तच जीव टाकतात आणि तो जो कोणी असतो ना तोही इमानेइतबारे त्यांचा जीव काढत असतो. तो एकेक गझल पेश करत होता . अंतरात्म्यातून. एखादी मराठीही. पाऊस, विरह अन प्रेम. बाहेर पाऊसच पाऊस . पण आतही लोक भावनांच्या वर्षावात भिजून गेले होते . तो आज भलताच मूडमध्ये होता आणि रसिकही .एकेक फर्माईश चालली होती . पण वेळ संपत आली होती. आता थांबायला हवं होतं. आयोजकांचा तसा निरोपही आला होता . शेवटची गझल- तसं त्याने अनाऊन्स केलं . ती मात्र कातिल हवी होती. कार्यक्रमाचा कळस ! ती गझल कुठली हे त्याने आधी ठरवलेलं होतं . पण त्याने ती अचानक बदलली . तो गाऊ लागला. भैरवीचे सूर छेडत . फिर मिलोगे कहीं यूं ये पता न था .... कमाल ! कमाल शब्द , कमाल धून अन कमाल आवाज. हरवलेल्या प्रेमाला साद घालणारा, काळीज चिरणारा ,डोळ्यांत पाणी आणणारा … जणू प्रेमाचा मेघमल्हारच ! काही पोरीतर डोळे टिपू लागल्या . त्याच्या या आताच्या आवाजात काहीतरी वेगळी जादू होती . त्याचा आवाज काही वेगळाच लागला होता . दैवी . कातर ! बाहेर खतरनाक पाऊस .त्या शांत गझलेला द्रुतलयीत ताल देणारा . लोकांनी वन्स मोअर दिला - तो पुन्हा तीच गझल गाऊ लागला . पण नाही - ती आधीची कशिश या आवाजात नव्हतीच . त्या गझलपुरता आधी तो - तो नव्हताच जणू. कोणी वेगळाच . हा बदल त्याला स्वतःलाच कळला . पण त्याने गझल पूर्ण केली . त्याने ऐनवेळी दुसरीच गझल गायली होती. कारण - ऐकायला ती आली होती - जिला त्याची नजर नेहमीच शोधत असे . चिरल्या काळजाने. त्याच्या दिलातला दर्द तीच तर होती . आधीही अन आताही . अन ती नजरेला पडावी . कधी ? तर शेवटच्या गझलला. कंबख्त नसीब ! अन वन्स मोअरला ती निघूनही जावी ना . तो येडा पाऊस गपकन थांबल्यासारखी ! काही क्षण तसेच अधुरे ठेवून … तिच्या नव्याबरोबर. पैसेवाल्या आयोजकांच्या पोराबरोबर.