नमस्कार मंडळी, धाग्याच्या नावाने बिचकून जाऊ नका!!! कृपया एकवार वाचण्याचे कष्ट घ्या... तर मंडळी, आपलं शास्त्रीय संगीत बर्‍याच लोकांना वाटतं तसं दुर्बोध आणि क्लिष्ट मुळीच नाही. किंबहुना, ते अत्यंत मनोरंजक आहे. आंतरजालामुळे संगीताची देवाणघेवाण मोठ्या प्रमाणात होउ लागली आहे. याचा माझ्या सारख्या शास्त्रीय संगीताच्या पंख्यांना मोठा फायदा झालेला आहे. आणि ईस्निप्स.कॉम सारख्या अनेक संस्थळांवर संगीत अपलोड करण्याची सुविधा आहे, ज्याचा आपण फायदा घेणार आहोत. या धाग्याचा उद्देश असा आहे, की आपल्याला आंतरजालावर शास्त्रीय संगीताचा एखादा उत्तम तुकडा सापडला, तर त्याचा दुवा कृपया द्यावा. शक्य असल्यास तो कलाकार, तो राग याबद्दल थोडक्यात माहिती द्यावी. म्हणजे सर्व मिपाकरांना त्या संगीताचा आनंद घेता येईल. एकच अट अशी की इथे केवळ शास्त्रीय अथवा उपशास्त्रीय (ठुमरी, कजरी, दादरा, टप्पा, नाट्यगीत वगैरे शास्त्रीय संगीताशी जवळचे प्रकार) यांचेच दुवे द्यावेत. गझल, भावगीत वगैरे प्रकार इथे टाकू नयेत, जेणेकरून हा धागा मूळ मुद्द्यापासून भरकटणार नाही. उपशास्त्रीय संगीतही ज्या रागात आहे त्या रागाचं नाव दिल्यास उत्तम होईल (माहित नसल्यास आपले ज्ञानी मिपाकर मदत करतीलच). यानिमित्ताने मिपावर शास्त्रीय संगीताविषयी चर्चा होउन मिपा अधिक समृद्धच होईल अशी आशा आहे. तर मंडळी चला शास्त्रीय संगीत ऐकूया...