पुतळा
------------------------------------------------------

' साहेब ...'

' बोल ...'

' शासनाच्या प्रत्तेक निर्णयाला विरोध करायचा हीच आपली पक्षीय नीती आहे ना ? '

' बरं ? मगं ? '

' मग मुख्यमंत्र्यांच्या नव्या घोषणेचं आपण स्वागत आणि समर्थन कसं केलत ? '

' कोणती घोषणा ? '

' तीच ... शहरातल्या मध्यवर्ती भागात त्या राजनेत्याचा पुतळा उभा करण्याची ?

आपण म्हणालात, की कुठल्या ही विधायक कार्यात आम्ही सत्याधार्‍यांच्या बाजूने राहू ! सत्ताधारी पक्षाला साथ देऊ ! '

' अरे मूर्खा , पुतळा उभा करण्यासाठी वर्गणी गोळा करावी लागेल .'

' बरोबर ! '

' या कामात आपण त्यांना मदत करु ! '

' का ? '

' म्हणजे वर्गणीचा काही भाग आपल्या खजिन्यात जाऊ शकेल !'

' हं ! हे ही बरोबर ! '

' पुतळा उभा केल्यानंतर कुणी ना कुणी, कधी ना कधी , पुतळयाची विटंबना करणारच ! '

' अं ...'

'...... आणि तसं नाही झालंच, तर आपण ती व्यवस्था करु ... काय?

' पण का ? '

' त्या निमित्याने शहरात दंगा होईल. जाळपोळ, लुटालुट होईल. मग काय, आपली चांदीच चांदी ... काय ?'

' खरंय साहेब ...'