अत्तरायण..! भाग - २

अत्तरायण..! भाग - १
इसीलिये हीना अपना पेहेला प्यार है। वो जिंदगी के आखरी दम तक चलता रहेगा।
पुढे चालू.....
====================
२) अत्तरफूल :- काय वाटतं नाव ऐकल्यावर? गोंधळात पडायला होतं ना? पण हे अत्तर ज्याचं आहे..त्या फुलानीच आजवर कित्येकांना गोंधळात टाकलय. कित्येकांचे गोंधळ सोडवलेत,वाढवलेतंही! मी ही पहिल्यांदा गोंधळलोच होतो. (आणि तो गोंधळाचा प्रसंग मला पुन्हा आठवून दिला तो एका गोंधळ्यानीच!) म्हणजे ही केवळ शब्दक्रीडा नव्हे. आमचा एक पथ-नाट्यांच्या कंपूत भेटणारा मूळचा देवीचा गोंधळी असणारा पहाडी आवाजाचा मित्र...(हाय हाय! याला एकदा मिपावर का पेश करु नये? :) ) मला एकदा भेटला.आणि म्हणतो कसा? :- "ओ भटजीबाबा..किती दिसानी भेटले!? आता जरा हात करा आधी फुडं..मागल्या टायमाला आमाला लावलंवतं, त्ये तुमचं कळीमोगरा सोडा...आनी ह्ये बगा अस्सल मोगरा" असं म्हणून त्यानी माझ्या हतावर ते चढवलं..आणि मी वासावरून तरंगत तरंगत एकदम तीन ठिकाणी गेलो..त्यातलं पहिलं ठिकाण म्हणजे मी नववीत (आणि नवं-वीत! ;) ) असतांना दातार क्लासेसच्या अष्टांग आयुर्वेद महाविद्यालयाच्या इमारती शेजारील एका म्होट्या झाडावर यंगून एक म्होट्टं मश्रुम काढलवतं..(त्या क्लासच्या जीवशास्त्राच्या बैं च्या सांगण्या वरून! ) आणि माझा ह्यो पराक्रम पाहून..(पराक्रम मंजी पावसानं निसरड्या झालेल्या झाडावरून आदी २ जनं निसटलेवते,आनी आमी फैल्याच फटक्याला डायरेक वर!) तर...,माझा ह्यो पराक्रम पाहुन, आमच्या त्या नव्वीच्या क्लास मधल्या एका कोमल फुलानी, "तू खुप धाडसी आहेस!" असं मोहक वाक्य म्या पामराच्या कानांवर सोडून मला हे अत्तरफूल हातास लावलंवतं! आणि उरलेलंही (मलाच!) दिलं होतं. हाय...हाय.. :D नंतर म्या येक अटवडा पूर्न हवेत होतू..आनी माजा मैतर जग्या'ला दर्रोज त्ये हत्तराची बॉटली दाकवून जळवत होतू. पुढे बॉटल संपली..पण तो पहिला वहिला सुगंध मनावर इतका बिंबवून गेली,की आता मोगर्‍याचं अत्तर म्हटलं ,की मला दातार क्लासेसची ती इमारत,आणि तो कोमल प्रसंग अठवतो.

दुसरी आठवण नगरच्या वेदपाठशाळेत असतानाची. ते दत्तमहा(सं)स्थान असल्यामुळे, तिथे अनेक उत्सवांना देवळात निरनिराळी अत्तरे (भेट) यायची.. त्यात एकदा ASHAN या कंपनीचं हे अत्तर अत्तरफूल या नावानी समोर आलेलं.

(फोटो:- अं.जा.वरुन.)
मला तेंव्हाही हे नाव एकदम पटलं होतं. अहो..,ज्या फुलात,त्याच्या सुवासातच एक निसर्गदत्त अत्तर आहे,त्याचच नाव त्याला दिलं तर तेच योग्य आहे..फुलात अत्तर..म्हणून अत्तरफूल! मी ती छोटीशी बाटली,एका सेवेकर्‍याला गुळ-लाऊन मिळवती होती. आणि रोज रात्री छातिला व्हिक्स चोळतात ,तसं ते अत्तर लाऊन मी गोपायचो. आहाहाहाहाहा... मेले डास कचकून चावायचे,त्यात हेच एक सूख होतं तिथे.

तिसरी आठवण आहे,ती २००४ साली ज्ञानप्रबोधिनीच्या इमारती बाहेर भेटलेल्या एका नामी अत्तर व्यापार्‍याचीच.. मी त्याला माझी अत्तरातली मुशाफिरी दाखवता दाखवता,त्यानी ह्या मोगर्‍या'चा असा काहि कड्क माल माझ्या शर्टाला लाऊन दिला,की पुढे दोनदा धुतल्यानंतरही त्या शर्टाला तो वास कायम होता. (सध्या ही व्यक्ती माझी अत्तरगुरु आहे. आणि शक्य झाल्यास मी त्याच्याकडून शिकुन ह्याही धंद्यात पडण्याचे चिंतन मनात करत आहे..साला गुरु माणूस आहे एकदम..पण मेला,त्याच्या विद्येविषयी विचारतोय..असा वास जरी लागला,तरी चटकन विषय बदलतो.पण मी ही खमक्या आहे,सोडणार नाही त्याला! ;) )

तर ही झाली माझी आणि मोगर्‍याच्या अत्तराच्या परिचयाची झलक. बाकि,मोगरा हे फूल असो वा अत्तर..! शोकमुक्त्/भयमुक्त करून मनाला प्रस्स्स्स्स्स्स्स्स्स्स्न्न्न्न्न्न्न करणारा याचा वास असतो. मी ह्या फुलांच्या रांगोळ्यांकरिता मार्केट यार्डात जातो..तेंव्हा मोगर्‍याच्या सिझनला तर मला रांगोळ्यात ह्याला वापरायचा मोह होतो..तो केवळ याच्या त्या मंत्रमुग्ध करणार्‍या वासामुळेच! या मोगर्‍यावर कित्येक प्रेमिकांनी/कविजनांनी आणि कुणि कुणि आपलं शब्दभांडार मुक्त हस्तानी उधळलेलं आहे. मी मोगर्‍याच्या वासाला उपमाच द्याविशी वाटली,तर ती माणुसकीची देइन! ती प्रत्येकामधे जेव्हढी असते .. तेव्हढीच येते!.फुकटचा आणला आव,की गडगडला त्याचा भाव... हे मोगर्‍याशी नातं जोडण्याचं सूत्र आहे.

मोगरा आहे शायरी
मोगरा आहे फकिरी
मोगरा आहे दरबारी
राजे अन् देवादिकांच्या

मोगरा प्रेमाचा कळस
मोगरा प्रीतीचे बाळसं
जाई जुईला स-रसं
त्या त्या वेलीच्या

गजरा म्हणूनी माळावा
उगे नुसता चाळावा
न जमला तर वहावा
पायी देवतांच्या!!!

ऐशी याची महती
सांगू किती तुंम्हा प्रती?
ज्याची त्याची स्व'मती
त्याने त्याने शोधावी.

पहा........काहिही ध्यानी मनी नसताना,ह्या नम्र आणि साध्या स्वभावाच्या फुलाने मला कित्ती तरी लिहितं करून सोडलं आज!
आता शब्द खुंटलेले आहेत.पुढे काहिही बोलता येणार नाही.
तेंव्हा..काहि क्षण गुंततो..
आता मी.....
माझ्या त्या...
अत्तरफुलात..!
=================================
क्रमशः