मी नुकतेच एका इंग्रजी लेखकाचे एक 'क्रिप्टिक' वाक्य वाचले. ते खाली दिले आहे. Parliament is so strange. A man gets up to speak and says nothing. Nobody listens..... and then everybody disagrees. पार्लमेंट ही किती अजब जागा आहे! एक सदस्य बोलायला म्हणून उभा राहतो. कांहीच (महत्वाचे) सांगत नाही. कोणीसुध्दा (तो काय बोलतो आहे ते) ऐकत नाही ....... आणि सारेच त्याच्याशी असहमत होतात. काल आणि परवा आपल्या लोकसभेच्या खास अधिवेशनाचा 'आँखो देखा हाल' पाहतांना ते वचन पुन्हा पुन्हा आठवत होते. आपल्या लोकांनी त्यात थोडी मोलाची भर टाकली आहे. काय बोलले जात आहे हे कोणीसुध्दा ऐकण्यापूर्वीच कांही लोक आरडाओरड करून त्याचे बोलणे बंद पाडतात. तरीही तो बोलत राहिलाच तर ते कुणालाही ऐकू जात नाही. सभापती डोळस असून सुध्दा द्यूतसभेतल्या धृतराष्ट्रासारखे "ये क्या हो रहा है?" असे सारखे म्हणत असतात.