राम राम मंडळी! काय मग? कसं काय चाललंय? काय म्हणतंय औंदाचं पीक-पाणी? :) आज धनत्रयोदशी! वर्षभर आपण ज्या सणाची आवडीनं आणि आतूरतेनं वाट पहात असतो तो दिवाळसण (हं.हं...नवविवाहित मित्रांनो, तोच तो..तोच तो, आणि जूनविवाहित मित्रांनो, 'तो' नव्हे पण आपला साधाच दिवाळीचा सण ;) ) आजपासून सुरु होतोय. मी विचार केला, रोज आपण सतराशे साठ खरडी मित्रमैत्रिणींना धाडत असतोच, पण असेही कित्येक मायबाप मिपाकर आहेत, ज्यांच्याशी नेहमीच संवाद होतो असे नाही. तर मग आपण ह्या धाग्याद्वारेच दिपावलीचं अभिष्टचिंतन करुया. :) आज संध्याकाळी घरोघरीचे बापयलोक घरच्या धनाची पूजा करतील, घरच्या लक्ष्मी गाय-वासरांना ओवाळून, त्यांना गोडाचा घास खाऊ घालून वसुबारस साजरा करतील.. घरोघरीचे आकाशकंदील आज चमचमायला सुरु करतील, मिणमिणत्या पणत्या लखलखून येतील, पोरंसोरं फटाक्यांच्या खोक्यात लुडबुडून दंगा करतील...स्वयंपाकघरांतून तळणीचे, बेसनाचे खमंग वास जीव खुळावतील.. कामकाजासाठी दूर असलेले एकेक चाकरमानी आजपासून जमेल तसं आपापल्या घराकडं ओढीनं धावत निघतील..३-४ पिढ्या सोबत बसुन आनंदाच्या चार गुजगोष्टी करतील... चला, आजपासून आपणही ह्या आनंदात आकंठ बुडून जाऊया. दिवाळीचा हा आनंद चढत्या भाजणीत वाटूया. 'दिवाळी सण मोठा, नाही आनंदा तोटा' म्हणतात ते काय उग्गाच? :) मायबाप मिपाकरहो, ही दिवाळी तुम्हा सर्वांना, तुमच्या आप्तस्वकियांना सुखाची, समृध्दीची, भरभराटीची जावो हीच श्रीशंभोचरणि प्रार्थना! दिपावलीच्या लक्ष लक्ष शुभेच्छा!!!