पुस्तकविश्वचा दिवाळी अंक

नमस्कार, पुस्तकविश्वचा दिवाळी अंक निघावा असा मानस आहे. पुस्तकविश्व हे संस्थळ 'पुस्तक' या एकाच विषयाला वाहिलेले असल्याने आपल्यात विषयाचे बंधन जरी असले, तरी त्यातही अधिकाधिक वैविध्य साधायचा मानस आहे. पण अर्थातच हे तुम्हा सर्वांच्या सहभागाशिवाय शक्य नाही. वेळ थोडका आणि मनोवारू तर चांगलंच उधळतंय, तेव्हा आपण सर्वांनी मिळून छोटा आणि नेटका अंक निघण्यासाठी सर्वतोपरी प्रयत्न करूयात. सध्याच्या संकल्पनेनुसार, पुस्तक परिचय हा प्रकार पुस्तकविश्ववर नवा नाही, त्यात अद्याप न चोखाळलेले प्रकार नक्कीच इथे मांडता येतील. १) पुस्तकांशी आपले नाते: या प्रकारात सदस्यांनी आपल्या विशेष आवडीची, ज्यांच्याशी आपले नाते जोडल्यासारखे आहे अशा पुस्तकांबद्दल लिहावे. या प्रकारच्या लेखात एखाद्या पुस्तकाचे तुमच्या आयुष्यातले स्थान कसे असावे, त्याह्चे तुमच्याशी नाते कसे असावे या संबंधीचे लिखाण अपेक्षित आहे. २) अज्ञात पुस्तकं :- यात चांगली पण लोकांना सहसा माहित नसणार्‍या पुस्तकांचे परिचय यावेत. यात एखाद्या प्रसिद्ध लेखकाची अप्रसिद्ध पुस्तके असेही लेखन चालेल. अनवट पुस्तकांचे परिचय या प्रकारात अपेक्षित आहेत. ३) अप्रमाणभाषेतील साहित्य (जसे कोकणी, वर्‍हाडी, खानदेशी, आगरी वगैरेची ओळख).अशा पुस्तकांची किमान ओळख करून दिल्यास विषय आणि भाषासौंदर्य याचीही माहिती होईल. ४) कवितासंग्रह :- यात कवितासंग्रहाचे रसग्रहण अपेक्षित आहे. ५) माझे ग्रंथालय. ते ग्रंथालय, तिथला साठा, तिथले अनुभव, त्याच्याशी आपला ऋणानुबंध वगैरे असा लेख छान वाटेल. अथवा ज्यांचा व्यक्तिगत ग्रंथसंग्रह पुष्कळ आहे, ते लोकही ही पुस्तके कधी आणि कशी जमा केली, त्यांची निवड, जोपासना, निगा कशी केली इत्यादींबद्दलही लिहिता येईल. ६) अनुवाद :- मराठीतले अनुवाद आणि त्या अनुवादातले बलस्थाने. कोणत्याही एखाद्या उत्तम अनुवादाबद्दल इथे लिहिता येईल. त्या अनुवादामधे तुम्हाला काय आवडले??? अनुवादकाची शैली इत्यादी विषयी लिहिता येईल. ७) पानपुरके: कोडी, खेळ, विनोद, व्यंगचित्रे इ. आवाका बराच मोठा आहे. यातूनही गाळणी लावून काही विषयप्रकार कमीजास्त करता येतील. वर दिलेले विषय आणि गाईडलाइन्स यांचे काटोकर पालन करावेच असे काही नाही. तुम्हाला लिहाव्याशा विषयावर आपण लिहूच शकता. तर आता वेळ खुप कमी उरला आहे तर लवकरात लवकर घ्या लिहायला आणि तुमचे लिखाण admin@pustakvishwa.com या आयडीला व्यनी द्वारे पाठवा. लेखन पाठवण्याची शेवटची तारिख २५ ऑक्टोबर २०१० ही आहे.