वृद्धांच्या समस्यांचे चित्रण करणारी 'एका वृद्धाचे मनोगत' ही जागु ह्यांची कविता वाचली आणि आमच्या डोळ्यासमोर काही बेरकी म्हातारे तरळले! म्हटलं ताणलेल्या मनाला जरा विसावा देऊयात! ;) 'साठी बुद्धी नाठी' व्रत घेतले आहे कांगाव्याने आजाराच्या भंडावले आहे जेवणापेक्षा चटकमटक पोट भरत आहे सल्ले कुणाला देऊ? मन उसासत आहे जेष्ठ नागरीक म्हणून उच्छाद मांडला आहे टीका करत तरुणाईला पुरा कांडला आहे सौभाग्यवती बोटं मोडून करवादते आहे 'हिरवट मेले, नजर कशी भिरभिरते आहे!' योगापेक्षा भोग मोठे मन गर्जत आहे मुंबई-पुणे प्रवासात वड्याचं कर्जत आहे! मुलं-सुना कंटाळून पुरते आटले आहेत 'इस्टेटीत वाटा नको' म्हणत सुटले आहेत! 'मृत्युपत्र, करुन ठेवलंय' सारखा कण्हतो आहे 'जरा शांत बसाल का?' जो तो म्हणतो आहे! माझा अनुभव, पिकले केस वाद घालीत आहे सगळे गप्प म्हातार्‍याच्या हाती कोलीत आहे! चतुरंग