सहज मात्र

सहज लिहून पाठवतोस तू
जे सूचतं तुझ्या मनात...
मी मौनात घुसमटते अन्
शोधत राहते शब्द मात्र...

सहज फिरतोस कुठे कुठे
अन् म्हणतोस, "येशील का?"
मनपाखरू झेपावतं पण...
पाय तिथेच चौकटीत मात्र...

सहज गातोस गाणे कधी
तालसुरांत बरसून जातोस
स्वरधारांच्या वर्षावात मी
चिंब भिजत राहते मात्र...

सहज येऊन बसतोस समोर
आणि बोलतोस असंच काही
दिवस जातो कसा तरी
रात्र सरत नाही मात्र...

अशा अनेक सहज गोष्टी
सहजपणेच केल्या असशील
त्यानंतर जगणे माझे
सहज राहिले नाही मात्र...!!

- श्वेता २४ © 2026