Skip to main content

पतंग

लेखक अरुण मनोहर यांनी रविवार, 02/11/2008 07:12 या दिवशी प्रकाशित केले.

लाल निळा शेपूटवाला
पतंग उडवू चला चला

खाऊचे पैसे देऊन
रीळ आणले वाण्याकडून
केला मांजा काचा कुटून
हात काचले घोटून घोटून

...........

दादाने मग ताव कापला
कमच्या बांधुन पतंग केला
झिरमिळी शेपट्या बांधल्या
मैदानावर जाउ चला

लाल निळा शेपूटवाला
पतंग उडवू चला चला
...........

ताणुन दोरी उंच फ़ेकला
सरसर भरभर हवेत चढला
गिरक्या घेता नाच नाचला
पक्षासंगे मजेत फ़िरला

.............

आणा खाली ढील सोडुनी
घ्या बाजुला हिसका देऊनी
चढवा दुसऱ्या मांजाखालुनी
वळसे घाला गोल फ़िरवुनी

लाल निळा शेपूटवाला
पतंग उडवू चला चला
.........

दोन पतंग असे गुंतले
डावी उजवी करू लागले
एकमेका खूप खेचले
दमली ओरडुन मुले

............

बघा बघा तो खाली आला
हा तर आहे पतंग अपुला
कसा तरंगत दूर चालला
पळा पकडुया चला चला

लाल निळा शेपूटवाला
पतंग उडवू चला चला

लेखनविषय:
लेखनप्रकार
वाचने 2314
प्रतिक्रिया 7

प्रतिक्रिया

मदनबाण रविवार, 02/11/2008 10:05

पतंग उडवण्याची इच्छा आता प्रबळ झाली !!! :)

मदनबाण.....
"Hinduism Is Not a Religion,It Is a Way Of Life."
 -- Swami Vivekananda