पूर्वी लहान असताना परीक्षा आणि अभ्यास या मुळे नको वाटणार्‍या मार्चची मी इथे आल्यापासून आतुरतेने वाट बघते. मार्च उजाडला की गार्डन सेंटर च्या फेर्‍या सुरू होतात. टॉप सॉईल, कंपोस्ट, बियाणं सगळ्याची खरेदी होते. छोटी-मोठी अवजार बाहेर येतात. भरपूर ऊन येणार्‍या खिडक्यांसमोर सीड स्टार्टर चे ट्रे मांडले जातात. हळू हळू त्यात छोटी रोपं तयार होतात. काही जगतात, काही कोमेजून जातात. बाहेर जमीनीची मशागत केली जाते. तिथेही बी पेरले जाते. तयार केलेली रोप जमिनीत लावली जातात. हळू हळू माझा वेजी पॅच आकाराला येतो. मुख्य म्हणजे या सगळ्यात नवरा उत्साहाने सामिल होतो.