सॉफिस्टीकेटेड

सॉफिस्टीकेटेड ही दहा एक वर्षांपूर्वीची गोष्ट आहे. मी दादर पश्चिमला कॅमेरा दुरुस्तीसाठी गेलो होतो. तेथे प्लाझा सिनेमासमोर तृप्ती म्हणून एक उत्तम हॉटेल आहे. याचे मालक श्री भागवत हे आमचे तसे दूरचे नातेवाईक आहेत. परंतु ते सर्व कुटुंब आमच्या कुटुंबाचे अत्यंत जवळचे स्नेही आहेत. तृप्ती हॉटेल हे राजेंद्र आणि श्रीरंग हे दोन चुलत भाऊ चालवतात. ती जागा त्यांची वडिलोपार्जित असून त्याचा त्यांनी अतिशय सदुपयोग केला आहे. मी त्या हॉटेलच्या समोरून चाललो असतात श्री राजेंद्र भागवत बाहेर उभे होते. ते आमच्या कडून पैसे घेते नाहीत आणि कुणाकडून काहीही फुकट घेऊ नये ही आमची घरची शिकवण. त्यातून सरकारी नोकरी तसलं तरी लष्करात नोकरी असल्याने फुकट काहीही घेण्याची मला सवय नव्हती. म्हणून मी आपलं दुसरीकडे पाहत तोंड चोरून चाललो होतो तिचा राजेंद्रने मला पाहिले आणि लगेच आडवा आला. राजेंद्र --काय् रे कुठे चाललास? मी -- अरे असाच चाललो होतो राजेंद्र -- चल आत मी-- अरे जाऊदे जरा घाईत आहे. राजेंद्र -- अरे माहिती आहे काय घाई आहे ती चल चल म्हणून मला तो हात धरून आत घेऊन गेला. मी आरोग्य विभागात काम केले असल्याने रस घेउन ते हॉटेल अगोदर आतून बाहेरून पूर्ण पाहिलेले होते. स्वयंपाकघर अतिशय स्वच्छ होते सर्व पाईप नळ सर्व गोष्टी स्टेनलेस स्टील च्या होत्या आणि भागवत मंडळी कटाक्षाने ते चमकतील इतके साफ ठेवत असत. मी राजेंद्र बरोबर स्थानापन्न झालो त्याने थालीपीठ, कोथिंबीर वडी आणि मसाला ताक मागवले ते खात असताना मी त्या टेबलवर ठेवलेले मेनू कार्ड उघडून काय पदार्थ आहेत ते पाहू लागलो. त्यात बटाटे वडा एक प्लेट रुपये ८/- (२००५-६ ची गोष्ट आहे) आणि खाली ब्रेड बटर १५ रुपये. मी राजेंद्रला विचारले काय रे एवढे मोठे दोन बटाटे वडे चटणी आणि मिरच्यांसकट ८ रुपये फक्त कसे ? -- तो म्हणाला - मध्यमवर्गीय माणूस ठाणे डोंबिवली कल्याण हून खरेदी साठी दादरला येतो खरेदी आटोपून घरी जायला तास दीड तास तरी लागतो. घरच्या बाईला घरी जाऊन स्वयंपाक करून जेवायला अजुनच वेळ लागतो. तेवढ्या वेळात पोटाला आधार म्हणून आणि पटकन खाता येणारा चविष्ट असा पदार्थ. हा कोणताही नफा ना आकारता आम्ही देतो. पाहिजे तर समाजसेवा म्हण किंवा मार्केटिंग म्हण. मग मी त्याला विचारले की मग हे ब्रेड बटर दोन स्लाइस चे चार त्रिकोणी तुकडे फक्त आणि ते सुद्धा १५ रुपये? त्यावर तो हसत म्हणाला येथे "सॉफीस्टीकेटेड" लोक येतात आणि सांगतात आमच्या मुलाला "ब्रेड बटरच लागतं". म्हणून अशा लोकांची ही "सोय" आहे. बाकी किती नफा ते तू विचारू नकोस.