माझ्या घराशेजारीज मी एक बाग लावली आहे. बागेत भरपूर झाडं आहेत. त्यांना मी रोज पाणी घालतो. एकदाच फुल लागलेलं गलाबाचं रोपटं वर्षानुवर्ष जागा अडवून बसलंय. कधीतरी फुलेलंच या आशेनं मी त्याला शेण लावून कलम करत राहतो. एकदातर त्याच्या बुंध्यालाच कात्री लावली होती. पण पुन्हा तरारुन उगवलं. फुले मात्र त्याला कधीच लागली नाहीत.
कर्दळीची झाडे अमाप आहेत. आता कर्दळंच का लावली? असे विचारणाऱ्यांचा मला विशेष राग येतो. फारफार तर त्याच्या पुंगळ्या काढून मला वाजवायला आवडतात हे ही कारण असू शकेल. पण तेच असेल असंही नाही.
'कर्दळ' हे नावंच कसं ऐकायला भारदस्त वाटतं. 'कर्दळीच्या वनात' वगैरे असं लोकांनी लिहून ठेवले आहे. आमच्या शेतातपण बोरीच्या झाडाखाली कर्दळंच उगवलीय. शेवटी कर्दळंच ती. त्याच कसली आलीय आवड निवड. पण मला आवडते. तिची लाल लाल फुलं बघायला मजा येते.
कोरफड सदृश्य एक झाडं आहे. लांब पाकळ्यांच पांढरं फुल त्याला लागतं. त्याचा मधला तुरा खायला पण मस्त लागतो. एकदा त्याचा सुवास घेतला की तासभर तरी नाकातून जात नाही. पण त्या झाडाखाली साप येतो म्हणून म्हातारीनं उपटून टाकलं. एकच झाड होतं. पुन्हा कुठे मिळालंही नाही.
एकदा मी ज्वारी, बाजरी, गहू, शेंगदाणे, वाटाणे, अगदी तांदूळसुध्दा एकमेकांत मिसळून एका चौकोनी जागेत लावले. खत वगैरे टाकून पाणी शिंपडलं. मग रानच करायचं ठरवलं. बारक्या काटकीनं सऱ्या पाडल्या. आडव्या मारुन वाफंबी तयार केलं. बांधावर आख्खी कैरीच पुरुन टाकली. हाताशी घावले म्हणून कडंनं चिंचोकेपण पेरले.
मग रोज उठून बारक्या शेताची प्रगती तपासणे हा माझा आवडता खेळच होऊन गेला. तांब्याभर पाणी शेताला पुरुन उरायचं. तिसऱ्या चौथ्या दिवशी बारीक बारीक कोंब मातीतून बाहेर डोकावू लागले.('जमलं की!' काळ्या काळ्या मातीत लपलंय कोण?) मन या कोंबावरून त्या कोंबावर उडत गेले. पण ह्यातली ज्वारी कुठली अन बाजरी कुठली? कशाचाच मेळ लागेना. बांधावरचा आंबा मात्र लगेचच ओळखू आला.
वाघ पाठीमागं लागल्यासारखी रोपं तरारुन वरती आली. गावात गच चिच्चा असताना बारक्या चिच्चंचा पाला एकदा खाऊन बघितलाच. अवर्णनीय.
आंब्याचा कोवळा पाला हातावर चोळून वास घेतला. आहाहा! कैरीचीच आठवण आली. एवढी, की थोडासा पाला खाऊनच टाकला. (बापरे, पुन्हा त्या वाटेला गेलो नाही )
भुईमूग तर एवढा वाढला उपटूनच टाकावा की काय असं वाटून गेलं. बारक्या चिल्यापिल्यांत थोराड टग्यासारखा तो पसरला होता. शेंगातरी मिळतील म्हणून शेवटी उपटूनच टाकला. एक मोठ्ठी शेंग वगळता हाताशी काय लागलं नाही. फोडून मग तिच्यातले शेंगदाणेही खाऊन टाकले.
मग गव्हाला लोंब्या लागतील, ज्वारी बाजरीला कणसं लागतील म्हणून वाट बघत राहिलो. पण रोपं तेवढीच राहिली. का राहिली? त्यांनी माझ्या इवल्याश्या शेतालाच जग समजलं की काय! बारक्या रानात बारकंच राहायचं असं त्यांनी ठरवलं असावं. नाहीतर माझ्या घराभोवती एव्हाना जंगल तयार झालं असतं. पिकलेले आंबे आणि गाभुळलेल्या चिंचा अंगणात सडा टाकत राहिल्या असत्या. पण तसं काही झालं नाही.
पुढे बऱ्याच दिवसांनी ते शेत जळून गेलं.
सध्या बगिच्यात एक बटाट्याचं रोप लावलयं. बघूया कसं जमतयं ते.
प्रतिक्रिया
4 Jun 2016 - 8:03 pm | यशोधरा
काय गोड लिहिलंय!
4 Jun 2016 - 9:56 pm | सौन्दर्य
शाळेत असताना (बहुतेक दुसरीत) गुरुजींनी एक-एक रोप आणायला सांगितले होते. काही वाटाणे पेरले होते व त्याची वाढ रोजच बघत होतो, त्याची आठवण झाली. मी देखील ज्या काही बिया हाताशी येतील त्या घरा मागच्या छोट्या बागेत टाकतो व पुढे काय होईल त्याची वाट बघतो. लहानपणी वाचलेली 'जॅक अँड द बिन स्टॉक' ही गोष्ट आठवली.
जव्हेरगंज, छान लिहिलत.
4 Jun 2016 - 10:10 pm | स्रुजा
किती सुरेख लिहीलंय. तुमच्या नेहमीच्या पठडीपेक्षा वेगळं आणि सुंदर लिहिलंय.
4 Jun 2016 - 10:22 pm | कंजूस
काय धमाल चाललीय!तुम्ही लखनउचे नवाब.तुमच्या बागेत माणिकमोतीच पिकतात जव्हेरगंज.
4 Jun 2016 - 11:42 pm | कविता१९७८
मस्त
4 Jun 2016 - 11:42 pm | कविता१९७८
मस्त
5 Jun 2016 - 1:48 am | पद्मावति
छानच लिहिलंय.
5 Jun 2016 - 7:08 am | खेडूत
मस्त मस्त...
अगदी माझं बालपणीचं बारकंसं शेत आठवलं.
5 Jun 2016 - 9:58 am | प्रचेतस
भारी लिहिलंय.
5 Jun 2016 - 11:16 am | भरत्_पलुसकर
लय भारी.
5 Jun 2016 - 2:54 pm | जेपी
चांगलय..
5 Jun 2016 - 3:45 pm | प्रा.डॉ.दिलीप बिरुटे
बगीचा आवडला. भारी वाटत होतं वाचतांना. लेखन आवडलं.
फक्त, गव्हाच्या ओंब्या ना ? की आणखी कुठे लोंब्या म्हणतात ?
-दिलीप बिरुटे
5 Jun 2016 - 9:41 pm | जव्हेरगंज
मी तरी लोंब्याच ऐकलंय पहिल्यापासून!
ओंब्या ही असू शकेल म्हणा!
6 Jun 2016 - 7:40 am | कंजूस
भाताचे दाणे भरू लागले की तुरा वजनाने लोंबतो - लोंब्या.गव्हाचे तसे नसते ते ताठच राहाते - ओंब्या.ज्वारी बाजरीची तर जाडजूड कणसंच लोंबण्याचा प्रश्नच येत नाही.
8 Jun 2016 - 2:23 pm | सरल मान
आमच्याकडे पण लोंब्याच म्हणतात आणि हो, खुप आवडल....
5 Jun 2016 - 3:55 pm | कानडाऊ योगेशु
कलादालनात टाकलाय म्हणुन चित्रे असतील अश्या विचाराने हा धागा उघडला. चित्रे काही दिसली नाहीत.मात्र ओघवत्या शैली मुळे लेख वाचनीय झाला आहे.
5 Jun 2016 - 9:43 pm | जव्हेरगंज
कलादालनात काहीतरी टाकायची इच्छा होती!
म्हणून आपलं हे असलं काहीतरी :)
5 Jun 2016 - 6:13 pm | चांदणे संदीप
कुठल्याही नॉस्टॅल्जिक लेखापेक्षा हा लेख सुंदर आहे! इतका, की लहाणपणीचा बगीचा, रोपे, वाफे आठवून भरून आलं मला!
किध्र्से लाते मियां ऐसे लेखां?
Sandy
5 Jun 2016 - 7:17 pm | किसन शिंदे
सुंदर!
5 Jun 2016 - 9:44 pm | जव्हेरगंज
अनेक आभार मंडळी !!
5 Jun 2016 - 9:48 pm | पैसा
:)
5 Jun 2016 - 9:57 pm | अजया
मस्त मस्त!
6 Jun 2016 - 9:01 am | नाखु
बालपण आठवणारं मुक्तक
आम्ची दाद स्वीकार करा.
बागवान नाखु
6 Jun 2016 - 9:04 am | स्पा
एकदम भारी लिहिलय
6 Jun 2016 - 9:53 am | ब़जरबट्टू
आवडले.. गुलाबाला एकदा फुलं आले, तुम्ही परत कात्री लावली, यावरुन तुम्ही डोळा असलेली कलम उडवली असून आता फक्त मुळ जंगली गुलाब वाढवताय, हे नमुद करतो.. :)
6 Jun 2016 - 10:10 am | समीरसूर
खूप संदर!
6 Jun 2016 - 10:47 am | पियुशा
अगदी माझ्या मनातलच, मेथिचि शेति केलिय उलुशिच, मिरच्यना चा एक हफ्ता होउन गेलाय परत फुल आलिअयेत , पुदिअना माजलाय सगळिकडे ;)वा ग्याला फुल आली होति प्न वान्ग नाही आले अजुन. पानपन
कुरडतल्यासार्खी झालिय , वाटाणावाळुण गेला :( जमल तर फोटु टाकते उद्या माझ्या पण उलुश्या शेतीचे :)
8 Jun 2016 - 9:19 am | जव्हेरगंज
टाका ना फोटोज,
उत्सुकता आहे बघण्याची!!
6 Jun 2016 - 4:27 pm | सूड
लिहीलंय छान!! पण आयडी बघता काही रुपककथा असावी का काय असं वाटून गेलं.
6 Jun 2016 - 11:03 pm | राघवेंद्र
छान लिहीलंय !!!