घुबडाचे पेलेट्स

काल आम्ही फिरायला बाहेर पडलो होतो. फ्रीवेवर नेहेमीप्रमणे लहान स्कंक, रकून सारखे प्राणी मधे मधे दिसत होते चिरडले गेलेले. यावेळेला मुलगी बरोबर असल्याने माझ्यातल्या "आई"ने ज्ञान द्यायची संधी दवडली नाही. मी मुलीकरता एक पुस्तक आणलय जे की तिने अजून वाचायचय पण मी वाचून संपवलय. त्या पुस्तकात- एका कुटुंबानी एक सोनेरी गरुडाचं पिल्लू पाळलेलं होतं आणि त्यांच्यापुढे समस्या ही होती की या पिल्लाला खायला काय घालायचं? कारण शिजवलेली कोंबडी, सॉसेज, मटण वगैरे खाऊन आठवड्या दोन आठवड्यात हे शिकारी पक्षी मरतात. या पक्षांकरता आख्खा उंदीर, रकून, स्कंक, खार, कोंबडी वगैरे असं खाद्य लागतं. गरूड, घार, घुबड वगैरे पक्षी हे खाद्य खातात आणि रोज सकाळी पेलेट्स (http://en.wikipedia.org/wiki/Pellet_(ornithology)) म्हणजे लंबगोल पिसं, हाडांचे गोळे बाहेर टाकतात. त्यानी त्यांची पचन यंत्रणा साफ रहाते. मग हे कुटुंब काय करायचं रोज सकाळी असं कारमधून रपेट मारायला बाहेर पडायचं आणि वाटेत येणारे रोडकिल (रस्त्यावर गाडीखाली आलेले प्राणी) उचलत जायचं. ते रोडकिल त्या गरुडाच्या पिल्लाला खायला घालायचं. मी हे सगळं माझ्या ४ थी तल्या मुलीला मोठ्या उत्साहानी सांगीतलं आणि आश्चर्य म्हणजे ते तिला आधीच माहीत होतं. तिने ३रीमधे शाळेत घुबडाच्या पेलेटसची चिरफाड केली होती. त्यात उंदराच्या पिल्लाची कवटी पाहीली होती. तिने माहीती पुरवली की पेलेटस हे गोल नसून लंबगोल असतात. मला खूप बरं वाटलं की इथे मुलांना लहानपणापासून बर्‍याच गोष्टी हाताळायला देतात, त्यांची किळस दूर करतात किंबहुना निर्माणच होऊ देत नाहीत., शास्त्रीय दृष्टीकोन जोपासतात. याच सुंदर फेरफटक्यामधे माझ्या मुलीनी मला अजून एक गंमतीशीर माहीती सांगीतली - एक पाल असते तिला "जिजझ लिझर्ड" म्हणतात. का तर ती पाण्यावर चालते : )