दिवाळी अंक २०२३ - मलपृष्ठ

संपूर्ण अंकातील चित्रांचा वापर केवळ गवि यांच्या संकल्पनेतून साकार झाला. आधी साध्या सरळ सूचनांना मिळणारं Dall-E चं ओबडधोबड उत्तर त्यांच्याच सल्ल्याने अधिक सुबक, अर्थपूर्ण येऊ लागलं. त्यामुळे या सर्व चित्रनिर्मितीत त्यांचा वाटा सिंहाचा आहे! एखादी गोष्ट मनापासून केली आणि ती इतरांना आवडली, की त्याचा आनंद शतगुणित होतो, तसं वाटतंय. एकीकडे व्यनिने लेख येत होते, त्यांना उत्तर देणे, ते लेख छाननी करून समितीसमोर ठेवणे, हे चालू होते. दुसरीकडे लेख निवड, अंक सजावट, प्रकाशन यांच्याविषयी दिवाळी अंक समितीमध्ये चर्चा झडत होत्या. त्यादरम्यान गवि यांनी कृत्रिम बुद्धिमत्तेचा वापर करून लेख आणि चित्रनिर्मिती करता येईल असे सुचवले. तेव्हा सर्वात आधी मुखपृष्ठ तयार करण्याचा विचार मनात आला, आणि एक दोन चित्रे Bing Dall-E कडून तयार करून घेतली. हा प्रकार इतका पण वाईट नाहीये, हे लक्षात आले. मग Dall-E ला आणखी चांगल्या, स्पष्ट, स्पेसिफिक सूचना देऊन हवं ते काढून घेता येऊ लागलं. आधी काही चित्रे इतकी वास्तववादी निर्माण झाली की, Dall-E ने ते एखाद्या खऱ्या व्यक्तीवर आधारित काढले असावे आणि त्यामुळे कुणाच्या खाजगीपणावर आपण अतिक्रमण करतोय की काय, अशी शंका आली. मग सर्व चित्रांत एक समान शैली असावी म्हणून, Dall-E ला अजून एक सूचना देणे सुरू केले, की पेंटिंग वाटेल अशी चित्रे काढ. एकदा सूचना केली, की तो/ते/ती चार चित्रे काढून देई. मग त्यावर खल होऊन एखादी अतिरिक्त सूचना देऊन चित्र सुधारले जाई. कधी कधी सूचना जास्त झाल्या की, Dall-E कन्फ्युज होऊन गडबड करत असे, जसे ओठांना चिकटलेला कप, मोटारसायकलवर पाठमोरा बसून चालवणारा दूधवाला, तीन पायांची बाई... पण बऱ्याचदा Dall-E ने अत्यंत उत्कृष्ट आणि मोहक (किंवा फॉर दॅट मॅटर जीवघेणे) चित्र काढून दिले. बऱ्याच लेखांमध्ये गवि यांनी स्वतः चित्रे तयार करून दिली आहेत. पैजारबुवांच्या लेखातील देवसेनेचे चित्र तर तीन जणांनी दोन दिवस कष्ट घेऊन तयार केलंय. त्यातील चार पाच चित्रे तर जीवेघेणे मालिकेतील होती, पण, ते एक असो...