मलाही हेच प्रश्न पडले आहेत . उद्बोधन करणारा कुणी त्राता आहे का ??? खरं म्हयी एकाच टिकटात समदी गाणी वाजाय पायशेन. वायली वायली टिकटा घ्याया नाय लागली पायशेंन ....

मिपा, माबो, ऐसी सगळीकडे अकाउंट काढून १-२ महिने रेंगाळून बघा. जे जास्त आवडेल तिथे जास्त बागडा.

दे दान सुटे गिराण असे एकाच कोपय्रावर ओरडून काय होणार? गल्लीगल्लीत वरडायला लागतं.

मलाही हा नेहमीच प्रश्र्न पडतो.

मिपा हे मित्रांच्या कट्ट्यासारखं आहे. इथे प्रसंगी कायपण भंकस मारायला अनुमती आहे. मायबोली आणि आयशी ह्यांच्या नांवातच आई असल्याने तिथं सारखं उपदेशाचं अमृत प्यायची तयारी ठेवावी लागते! आमाला अमृतापेक्षा मिसळीचा जास्त ओढा असल्याने...... :)

फरक असा आहे कि हि दोन वेगवेगळी संकेत स्थळ आहे आणि साम्य असं कि सगळे लेखक दोन्ही कडे आपले तेच तेच लेख टाकतात . त्यामुळे दोन्ही कडे त्याच त्याच लेखांची ( रिपीट ) संख्या खूप आहे . तुम्हाला जे आवडत असेल तिथे बागडावे .

तुम्ही संकेतस्थळांची अधिकृत धोरणे मानत असाल तर मिपा आणि माबो धोरणात जरासा फरक आहे. दोहोंची धोरणे लक्षात घेतलीतर मिपावर टोपणनावाने लेखन करण्याची मुभा अधिक सोईस्कर आहे -त्यामुळे लेखनात अधिक मोकळेपणा येतो -त्यामुळे मी माबोवर न लिहिता केवळ मिपावर लिहितो. माबोच्या अधिकृत धोरणानुसार बहुधा तुमचे व्यक्तिगत माहिती देणे अधिक बंधनकारक आहे, आणि डूआयडी परवानगी नाही. मिपावर डूआयडीने संपादक मंडळास अमान्य गोंधळ केला तरच अडचण - मिपाचे मूळ संस्थापक लेखन स्वातंत्र्याच्या बाजूने होते ती संस्कृती इथे अद्यापही कमी अधिक प्रमाणात मूळ धरून आहे. ऐसि अक्षरे वैचारीक दृष्ट्या मिपापेक्षा हुच्च प्रस्थापित असल्यामुळे असेल कदाचित लेखन स्वातंत्र्य हुच्च लोकांसाठी तांत्रिकदृष्ट्या मिपापेक्षा अधिक आहे पण प्रत्यक्षात प्रत्येक विषयावर आपला स्वतःचा वेगळा धागा काढण्याचे स्वातंत्र्य मिपावर अधिक आहे. ऐसि आणि मिपात आणखी एक सांस्कृतिक फरक ऐसिवर भारतीय संस्कृतीशी प्रामाण्य तोळामासा आहे शिवाय -वाचक मिपापेक्षा कमी आहेत. मिपावर भारतीय आणि विशेषतः मराठी संस्कृतीत असल्यासारखे वाटते आणि वाचकही मिपाला अधिक आहे. या दोन कारणांनी मी ऐसिपेक्षा मिपा प्रीफर करतो.

मिपा व मायबोली म्हणजे दादर-गिरगावसारखे आहे रे गबाळ्या. खरेदीसाठी लोक दोन्ही ठिकाणी पूर्वी जायचे. पण काहीना दादर-रानडे रोडच आवडायचा तर काहींचे 'प्रार्थना समाज' शिवाय पान हलायचे नाही.

ऐसीवर मोजून आठ दहा डोकीच लिहीत असतात.

तिन्हीकडे कॉमन असणारे आणि तिन्हीकडे तितकेच फेमस असणारे फार लोक नसावेत.

केवळ फरक जाणून घ्यायचा उद्देश आहे का? आपापल्या आवडीचे विषय चर्चा करणारे जिथे मिळतात तिथे तो विषय काढणे हा उपाय असतो. तिनही ठिकाणी पिंका टाकत फिरणारा कोण रे तो? गबाळे तुम्ही काहीच लिहिलं नाही. चर्चा घडवायला तुमची चार मतं टाका.

>>>मिपा आणि मायबोली मध्ये काय फरक आणि साम्य आहे? मिपा हे एक मराठी माणसांनी मराठी माणसांसाठी अतिशय उत्तम चालवलेलं आणि लेखन वाचनासाठी प्रसिद्ध असलेलं जगभरातील एक नामांकित मराठी संकेतस्थळ आहे. बाकी संकेतस्थळ चालू आहेत की नाही माहिती नाही आणि ती तपासून पाहण्यात इंट्रेष्टही नाही. -दिलीप बिरुटे (कट्टर मिपाकर)

रोचक चर्चा !!

माझ्या मते दोन्ही ठिकाणी फरक असा काही नाही. प्रत्येक जण कुठेतरी रमतो. मी सुरवातीला आंजावर जिथे जागा मिळेल तिथे लिहित होतो . ऐसीविषयी उशीरा कळले तोपर्यंत तिथे जाउन लिहायचा उत्साह संपून गेला होता. सुरवातीच्या लेख कविता यांना मिपावर ज्या प्रतिक्रिया मिळाल्या तशा माबोवर मिळाल्या नाहीत मग हळूहळू माबोवर लिहायचा उत्साह मावळला. तरीही मी जर कविता लिहिली तर माबोवर टाकत होतो. आता तर लिखाणच सणासुदीला होते ते परत चार ठिकाणी टंका कंटाळा येतो. मिपाचे आणखी एक वैशिष्ट म्हणजे मिपाची जुनीजाणती मंडळी डॉक्टर बिरुटे सर, पैसा, एस, स्पंदना (आता अॅक्टीव्ह नाही) मुविकाका(हल्ली दिसत नाही), बॅटमॅन(दिसत नाही) अभ्या, वेल्लाभट, पद्मावती अशी बरीच नावे घेता येतील ही मंडळी नवीन कोणी लिहले असेल तर त्याला आवर्जून प्रोत्साहन देतात, त्याला आवश्यक त्या सुधारणा सुचवतात. त्या व्यक्तीचा उत्साह वाढवतात आणि तो लिहित राहतो. जर का त्याने धाग्यांचा रतीब टाकायला सुरवात केली तर मात्र त्या व्यक्तीला मिपाचे वाक्यप्रचार ऐकवून गप्प करतात. राजकारण, समाजकारण त्यावरुन होनारे वाद , उगाच काडी करने असले प्रकार सर्वत्र असतात. शुद्धलेखनाचा किंवा खूप विचारपरिवर्तक वगेरे लिहण्याचा आग्रह मिपा माबो दोन्हीवर नाही. असे संकेतस्थळ होती पूर्वी हे ऐकूनच धक्का बसला. त्यामुळेच मिपा माबो किंवा आणखीन काही असा विचार न करता लिहावे आपली जागा सापडतेच.

तिन्ही साइट्स ची प्रकृती वेगळी आहे. काही आयडी कॉमन आहेत पण चर्चेच्या स्टाइल मधल्या फरकामुळे तिन्हीकडे वेगळी मजा आहे. पण हे थोडे पूर्वी घरच्या पेपरचे असायचे तसे आहे. एकदा एकाची सवय लागली त्याला पर्याय म्हणून रोज दुसरा चालेल असे नाही. मी जे लेख लिहीतो ते बरेचसे तिन्हीकडे पोस्ट करतो. कारण साधे आहे - आपला लेख जास्तीत जास्त लोकांनी वाचावा, म्हणून. बराच वाचकवर्ग तिन्हीचा वेगळा आहे असे लोकांच्या वेळोवेळी वाचलेल्या पोस्ट्सवरून जाणवते, तसेच लेखांवर आलेल्या प्रतिक्रियांवरूनही. यातील कोणत्याही (ते ही फिक्स असे नाही) एका साइट वर लेख लिहून तेथे साधारण दिवसभर प्रतिक्रिया पाहून मग इतर ठिकाणी तो कॉपी करतो, काही दुरूस्ती वगैरे असली तर ती करून. सुरूवातीला बरीच वर्षे फक्त मायबोली माहीत होती त्यामुळे साहजिकच तेथे अजूनही जास्त वेळ असतो. तेथील गेटटुगेदर्स ("गटग") मुळे अनेक लोकांशी आता वैयक्तिक ओळखी आहेत. मायबोलीवर जास्त वेळ रमण्याचे आणखी एक कारण म्हणजे तेथील "धावते" थ्रेड्स, किंवा बाफ (बातमीफलक्)/बीबी - जेथे साधारण २०-३० लेटेस्ट पोस्ट राहतात व आधीच्या वाहून जातात. तेथे अनेक थ्रेड्स वर नेहमीच्या लोकांशी गप्पा मारत बसता येते, काम करता करता एकीकडे. त्या गप्पा वेगवेगळ्या बाफ वरच्या इतक्या वेगळ्या असतात की दुसर्‍या साइट वर आहोत असे वाटेल. आजकाल राजकीय चर्चा मिपावर जास्त सखोल व विषयाला धरून असतात असे जाणवले. अनेक लेख फक्त मिपावरच दिसतात, इतरत्र नाही. त्यामुळे मिपावर सुद्धा रोज किमान एक चक्कर असतेच. मिपावरच्या प्रतिक्रिया एकदम परखड असतात असे जाणवते. इथेही अनेक ओळखी आहेत. बे एरिया मधल्या एका मिपा कट्ट्याला गेलो होतो. त्यानंतर मात्र अजून जमलेले नाही. मिपा आजकाल लोड व्हायला वेळ लागतो असेही गेले काही दिवस वाटले आहे. मात्र गेल्या काही महिन्यातील मिपामधले बदल जबरी आहेत. मिपा वरची विडंबने धमाल असतात. कधी कधी तर मूळ लेख/कविता आल्यानंतर अगदी लगेच विडंबन येते. ती कॅटेगरीच एकदम धमाल आहे. इतरत्र ते फारसे दिसत नाही. एखाद्या कवितेची, लेखाची रेवडी मिपावर जोरदार उडवली जाते. खवचट पोस्टी वगैरे इथे धमाल असतात. ऐसीअक्षरे तुलनेने नवीन आहे. तेथील खरडफळ्यावरची धावती चर्चा मला सर्वात आवडते. तसेच "अलीकडे काय पाहिलंत..." व तत्सम सदरे. तेथेही रोज चक्कर असतेच. फक्त ही सदरे सोडली तर खूप नवीन मटेरियल रोज असते असे नाही. त्यामुळे सहसा ही सदरे व खफ यावरच जातो. लिबरल विचार तेथे अत्यंत स्पष्टपणे व खुलेपणाने मांडले जातात, इतर साइट्स च्या तुलनेत. एखाद्या बाळबोध लेखाची सरकॅस्टिक रेवडी तेथेही जबरी उडवतात. ऐसी व मिपा दोन्हीकडे आपले लेखन किती लोकांनी वाचले हे ही कळते. माबोवर ते कळत नाही. माबोवर बाळबोध लेखांवर जुने जाणते येउन रेवडी उडवत आहेत असे पूर्वी व्हायचे. आजकाल जवळजवळ बंद झाले आहे. कोणत्याही लेखाची/कवितेची तारीफ करणारे काही आयडी सोडले तर बाकीचे पूर्ण दुर्लक्ष करतात असे सध्या दिसते. राजकीय बाबतीत ऐसी डावीकडे तर मिपा उजवीकडे झुकलेले आहे असे माझे मत आहे, एकूण पोस्टींमधून दिसणार्‍या सरासरी मतांनुसार. माबोवर दोन्ही भरपूर आहे.

आपल्याला मिपा आवडते.एखादा लेख माबो व मिपा दोन्हीकडे टाकतो.पण माबोला आता लोक नकोसे झालेत,सिंथेटिक जिनियस हा माझा आयडी काहीच कारण नसताना उडवला. आता विषय निघालाच आहे तर सांगतो,मिपावर माझे बरेच आयडी होते.पैकी नानासाहेब नेफळे हा आयडी प्रसिद्ध ,कारण हलकट मिपाकरांनी नाना माई अशी जोडी लावली होती. ऐसी म्हणजे चार टाळक्यांचे गप्पा ठोकण्याचे ठिकाण आहे.वैचारीक मैथुन करत दोन चार जणच तिथे कुथत बसलेले असतात.ते बंद पडायला आले आहे ऐसि. असो मिपाला शुभेच्छा!

माबोवरचं अन्नं वै प्राणा: अतिप्रचंड आवडतं. ते वाचण्याच्या निमित्ताने तिथे सदस्यत्व घेणे झाले. तिथे इतकी गर्दी आहे की कित्येक वेळा तुम्हाला खिजगणीतही धरणार नाहीत तिथली लोकं असं वाटत राहतं. ऐसीवर लोक अतिशयच कमी आहेत. कित्येक चांगल्या पुस्तकांची, सिनेमांची माहिती तिथे मिळते. एरव्हीही कित्येक दीर्घ अन प्रचंड माहितीने भरलेले लेख तिथे असतात. नविन लेखकांना प्रतिसादांची गॅरंटी मात्र नाही. कपाळावर चष्मा सरकवून रोखून पाहत आहेत लोक असा फिल येतो तिथे. पण तरीदेखिल तिथे लिहिणे आणि तिथले वाचणे चांगला अनुभव असतो. कित्येकदा अगदीच वेगळा पॅराडाईम नजरेस पडतो. एरव्ही विचार केला नसता अश्या गोष्टींवर झोत मारला जातो. मिपावर पुर्वी असत तश्या वाड्याप्रमाणे किंवा चाळीसारखे वातावरण आहे. अतिशय प्रतिभावान लोक सुद्धा लहानग्यांत मस्त मिळून मिसळून मजा करत असतात. इथे माणूस रमून जातो. जसे पट्टीचे अभ्यासक इथे आहेत तसेच नुसते टिवल्याबावल्या करणारेही आहेत त्यामुळे यावसं वाटतं परत परत.

एकमेव मिपाच.

ही अशी चर्चा इतर संस्थळांवर होते का? आणि होत असल्यास मिपाचं त्यात खुलेआम कौतुक होतं का? आणि होत असल्यास ते खपवून घेतलं जातं का? कुत्सितपणे विचारत नाहीये, तर इतरत्र अजिबात जातच नसल्याने माहिती नाही, पण उत्सुकता आहे.

मिपा व ऐसी - दोन्हीचे उल्लेख तेथे होतात. इथल्या चांगल्या चर्चा व लेखांच्या लिन्क्स लोक तेथे एकमेकांना देतात (मी अनेकदा दिलेल्या आहेत). "ख्पवून घेतले जातात" वगैरे म्हणण्याइतके ते मुळात कोणाला खटकतच नसावेत :)

मायबोलीवर मी याच नावाने सदस्य आहे तिथे एक लेख हि टाकला होता. त्याला चांगला प्रतिसादही मिळाला होता पण तेथे मुळातच इतके लोक आणि इतकी गर्दी असते कि लोकांनी विचारलेल्या प्रश्नांना उत्तरे द्यायला लेख शोधण्यासाठीच फार वेळ गेला. दुर्दैवाने मला भरपूर वेळ नाही त्यामुळे मी मायबोलीवर केवळ सदस्य म्हणून आहे. कधीतरी जेंव्हा मिपा बंद असते व्हॉट्सअप इ वरून वेळ मिळतो तेंव्हा तेथे चक्कर टाकतो. अशी वेळ सहा महिन्यात फार तर एकदा येते. बाकी माझे सर्वच्या सर्व लेख केवळ मिपावर आहेत. त्याला कुणी निंदा कुणी वंदा आपुन को कि फर्क पैंदा?