राम राम मिपाकर सभ्य स्त्रीपुरुषहो, आम्हाला कळवण्यास अत्यंत आनंद होतो आहे की मिपा कार्यकारिणी समितीचे सर्व सभासद, आणि आनंदयात्री जैनांचं कार्ट, १_६ विक्षिप्त अदिती या तिघांना खास करून खरडायच्या फळ्याच्या संपादनाचे सर्व अधिकार बहाल करण्यात येत आहेत. खरडफळ्यावर कुठली खरड रहावी, कुठली राहू नये, माफक टिंगलटवाळी, चेष्टामस्करी ही माफकच राहील, तिची कुस्करी होणार नाही, इत्यादी काळजी वरील तीन सभासदांनी घ्यायची आहे अशी आमची त्यांना जाहीर विनंती आहे.... आम्ही काही एका विश्वासाने या मंडळींवर हे काम सोपवत आहोत आणि ही मंडळी हे काम जबाबदारीने पार पाडतील अशी आम्हाला खात्री आहे! मिपाचा खरडफळा हा एक सर्वांगसुंदर कट्टा होईल अशी आम्हाला अपेक्षा आहे... सांभाळा आता खरडफळा! :) तूर्तास तरी वरील तीन मंडळींवरच ही जबाबदारी सोपवण्यात येत आहे. गरज वाटल्यास अन्यही काही सभासदांना सदर अधिकार देण्याचा आमचा विचार आहे.. काही कारणांनी वरील तीन मंडळींपैकी कुणाला ही जबाबदारी स्विकारणे मंजूर नसल्यास तसेही अगदी अवश्य कळवावे, ही विनंती...! गेले दोन दिवस मिपाच्या खरडफळ्यासंबंधी बराच धुराळा उडाला त्या दृष्टीने खरडफळ्याच्या बाबतीत आम्ही हे पुढचे पाऊल टाकत आहोत... कृपया सर्वांनी सहकार्य करावे ही विनंती... आपलाच, तात्या.