काल सकाळी घरून कामासाठी एके ठिकाणी जात असताना एक वाईट अनुभव आला. सकाळी साधारणपणे ९ च्या सुमारास पुणे-सातारा रोड वरून माझ्या दुचाकीने जात होतो. जाताना बिबवेवाडी चौकातील सिग्नल पाशी येऊन थांबलो. सकाळी ९ ची वेळ असल्याने सिग्नलवर दाटीवाटी झालीच होती. मी झेब्रा क्रोसिंग च्या मागे गाडी बंद करून शांतपणे थांबलो. आजू बाजूला सुद्धा काही गाड्या थांबल्या. तोच मागे एक कर्णकर्कश्श हॉर्न ऐकू येऊ लागला. मागे वळून पाहतो तर एक धिप्पाड व्यक्ती मला 'पुढे हो' असे हातवारे करून सांगत होती. मी तिला व्यवस्थित सांगितले कि 'बाबा रे, हिरवा सिग्नल नाहीये आता, थोडा वेळ थांब. मग पुढे जाऊ'. त्याने काही विचार न करता '**व्या' अशी शिवीच घातली. बाजूला हो. मी सुद्धा जरा रागाने विचारले कि 'काय रे, अशा शिव्या का देतोयेस ?' तर तो उत्तरला 'मी कोण आहे माहितीये का ? गप गुमान बाजूला हो, साल्या, **व्या. (अजून एक दोन आई बहिणीवरून शिव्यांची लाखोली). जरा भांडण होण्याची परिस्थिती येताच लगेच एक दोघा सुज्ञ गृहस्थांनी मला बाजूला घेतले. मी थोडा घाबरूनच बाजूला झालो. पुढे वाट मिळाल्याने ती व्यक्ती लाल सिग्नल तोडून, गाडी आडवी तिडवी घालून भरधाव वेगाने पुढे निघून गेली. बरं पोलिसाला सांगाव म्हटले, तर काय करता, इतका वेळ वाहतूक पोलीस समोरच उभा असून सुद्धा त्याने कानडोळा केला, ह्यावरून मी समजून गेलो , कि तो नक्की तिथला कोणीतरी (कु)विख्यात असला पाहिजे. नाहीतर त्याचा मामा, काका तरी कुठलातरी नेता पाहिजे. जाताना गाडीच्या पाटीकडे पहिले. तर काही लिहिलेले होते, त्यावरून 'राजेंच्या शूर पराक्रमाचा त्याला अभिमान आहे', असे काहीतरी लिहिले होते. सिग्नल तोडणे हे 'आपण किती ग्रेट आहोत' ह्याची ओळख करून देण्यासारखेच आहे. पण ते करताना रस्त्यावरील एक माणसाला शिव्यांची लाखोली वाहणे ते सुद्धा वाहतूक हवालादारच्या समोर. म्हणजे ह्यांच्या समोर कायदा किती दुबळा पडलेला आहे, ह्याचेच लक्षण आहे. तर मला प्रश्न पडतो. हि परिस्थिती आहे पुण्यातील भर सकाळी ९-१० च्या दरम्याना, आणि ते सुद्धा एका नावाजलेल्या रस्त्यावर. तर बाकी खेडेगावात, इतर वेळेस काय परिस्थिती असेल ? ह्या महान लोकशाहीच्या मुखवट्यामागे स्थानिक नेत्यांच्या जीवावर हे जे गल्लोगल्लीतले हुकुमशहा पोसले जात आहेत, ज्यांच्या पुढे कायदा नेहमी दुबळा पडतो, उलटे ह्यांनाच कायद्याचे संरक्षण मिळते. तर मी पुढे काय करावे ? एक बटन दाबण्यासाठी ५ वर्षे वाट बघावी का ? बंर, कितीही विचार करून मी ते बटन दाबले तरी हे गल्लोगल्लीतले हुकुमशहा नाहीसे होतील का ? मी कितीही कायद्याचे वागायचे ठरविले तरी हे मध्ये येणारच का ? शेवटी प्रयत्न तरी किती करायचे ?