विजुभाउनी विचारलेली "पानगी "ची रेसिपी. पानावर थापून करायची ती पानगी. १ वाटीभरून तांदळाचे पीठ १/२ टी.स्पून मीठ २ टी.स्पून साखर १/२ ते पाऊण वाटी दुध केळीची पाने १टे.स्पून तूप पातेल्यात तांदळाचे पीठ घेऊन त्यात मीठ, साखर वथोडे दुध घालून हाताने कालवावे. हे मिश्रण सैलसर असावे. त्याचे ३भाग करून, एक भाग केळीच्या पानावर गोलाकार पसरावा. वरून दुसरे पान झाकावे व गॅसवर तवा ठेऊन त्यावर ही तयार केलेली पानगी पानासकट ठेऊन दोन्ही बाजुंनी भाजून घ्यावी. पानगी शिजली कि पानापासून सहज निघून येते. पाने करपतात, काढून टाकता येतात. दोन्ही बाजुंनी भाजून पानगी ताटलीत काढावी. वर थोडे साजूक तूप घालून खाण्यास द्यावी. दुसरी पाने घेऊन उरलेल्या पिठाच्या पानग्या करून घ्याव्या. न्याहरी साठी हा चवदार, पोटभरीचा पदार्थ होतो. लोणचे किंवा कोरडी चटणी पानगी बरोबर वाढावी.