[शशक' २०२०] - बातमी

बातमी

"पेपर कुठे आहे ग? मला सकाळी चहासोबत पेपर लागतो माहिती आहे ना? "

"टेबलवरच आहे. जरा बघत जा आजूबाजूला. "

"सापडला एकदाचा. हे काय पुन्हा एक बलात्काराची बातमी ! "

"अहो ते रोजचेच झाले आहे आता. आम्हा बायकांना बाहेर फिरायचेच अवघड करुन टाकले आहे ह्या नराधमांनी. अगदी काही महिन्याच्या पोरीपासुन ते जख्ख म्हातारीपर्यंत कोणालाही सोडले नाही ह्यांनी.

"अगं पुढे म्हटले आहे की या प्रसंगात खुनापर्यंत गेली आहे त्यांची मजल."

"अहो म्हणूनच हे प्रकरण उघडकीस आले म्हणायचे. नाहीतर अश्या कित्येक केसेस बाहेरच येत नाहीत. "

"हे मात्र खरे की खुन झाला नसता तर ही घटना उघडकीस आलीच नसती "

"का हो ?"

"पिडीत व्यक्ती 'ती' नाही , 'तो' आहे !"