मिश्र डाळींची भजी

नमस्कार मंडळी, आमच्या घरी कोणाला जेवायला बोलावले असेल, कोणाचे केळवण, सत्यनारायण वगैरे अश्या काही पूजा असतील तर जेवणात पाहिजेतच अशी ही मिश्र डाळींची भजी. साहित्य :- १ वाटी उडीद डाळ १ वाटी मुगाची डाळ १ वाटी हरभर्‍याची डाळ ४-५ हिरव्या मिरच्या १ इंच आलं १ लहान चमचा धनेपूड १ लहान चमचा जिरेपूड चवीनुसार मीठ तळणीसाठी तेल कृती:- प्रथम उडीद डाळ, मुगाची डाळ आणि हरभर्‍याची डाळ एकत्र ५ ते ६ तास पाणी घालून भिजत ठेवावी. डाळी भिजल्यानंतर ५-६ तासांनी त्या चाळणीवर घालून ५-१० मिनिटे निथळत ठेवाव्यात. त्यानंतर मिक्सरमधून भरड वाटून घ्याव्यात. (डाळी अर्धबोबड्या वाटाव्यात. एकदम पीठ करू नये.) वाटतानाच त्यामध्ये हिरव्या मिरच्या घालाव्यात. पाणी अजिबात घालू नये. या वाटलेल्या मिश्रणात धनेपूड, जिरेपूड, मीठ, किसलेले आलं आणि आवश्यकता वाटल्यास थोडे तिखट घालून मिश्रण एकजीव करून घ्यावे. एका कढईत तेल तापत ठेवावे. तेल कडकडीत तापल्यावर छोटी छोटी भजी घालून खरपूस तळून घ्यावीत. चिंचेच्या चटणीबरोबर गरम असताना खावीत. चिंचेच्या चटणीसाठी :- चिंचेचा कोळ करून घ्यावा. त्यात गूळ, दाण्याचे कूट, तिखट, मीठ घालून चटणी ढवळून घ्यावी. ही भजी एकदम कुरकुरीत होतात. आणि वरील चटणीबरोबर एकदम चविष्ट लागतात. :) --शाल्मली.