मराठी साहित्य, संस्कृती आणि लेखनाचे व्यासपीठ
प्रवेश करा | सदस्य व्हा
मिसळपाव

मेथी डाळवडे

नूतन सावंत · · पाककृती
मेथी डाळवडे
थंडी आली की,माझी आई आहारतल्या मेथीचे प्रमाण वाढवायची.मेथीचे लाडूही केले जायचे,पण मला ते कधीच आवडायचे नाहीत.मेथीच्या भाजीचे वेगवेगळे प्रकार,मेथी घालून डोसे,घावणे, धिरडी,थालिपीठं बरंच काय काय व्हायचं.त्यातलाच एक चमचमीत पदार्थ म्हणजे मेथी डाळवडे,नाश्त्याला हमखास असायचेच.भरपूर थँडियासायची तेव्हा दिवळीपासूनच.सकाळी पहाते उठून अभ्यासला बसायचो तेही स्वेटर घालून, कं बांधून.आणि अभ्यास अर्धयवर आलेला असतानाच पाट्यावर वेतनाचा आवज येऊ लागायचा.लसूण,मिरच्या ठेचून,त्यात कोथींबीर,ओळखोबरे,मीठ ,साखर घालून चटणी वॅट असायची आई.हल्ली मिक्सरमध्ये वाटण जरताना मिक्सर उघडल्याशिवय काय वाटलं जातंय ते कळत नाही,पण पाट्यावर वाटताना ,वाटली जाणारी प्रत्येक गोष्ट आपला वेगवेगळा सुवास सोडत असायची आणि कान बंद असले तरी उघड्या नाकाला काहीतरी चमचमीत,तोंडात जाणार असल्याची सुवार्ता देऊन मनाला सुखवीत असे.चटणी वाटून झाली की त्याच पाट्यावर भिजलेल्या डाळी लसूण,मिरची, आल्यासह वाटल्या जायच्या.बाकीचे सोपस्कार पार पाडून १०/१५ मिनिटातच स्टोव्हच्या फुरररर आवाजासोमत डाळवडे कढईत पडल्याचा चुररर आवाज येत असे आणि त्याबरोबरच चणाडाळ आणि मेथीचा घमघमाटही नाकात शिरून जिभेला पूर आणत असे.एव्हाना वातावरणातला थंडावा कमी झालेला असे,स्टोव्हच्या उबेने,तेव्हा आम्ही कानावरचे रुमाल सोडून आईची हाक कधी कानावर पडते याकडेत्या फुररर आणि चुररर च्या तालावर ध्यान लावत असू. "चला रे,या नाश्ता करायला",असा आईचा आदेश आला की आम्ही तत्पर आज्ञाधारकपणे जात असू,आणि मग मेथी डाळवडयांचा समाचार चवीने घेत असू. आताही मी मेथी डाळवडे करते,त्या चित्रातली आई,पप्पा,दोन भाऊ ही मंडळी आज नसली तरी त्यांच्या सोबतीनेच खाते. त्या डाळवड्यांची ही कृती मिपाकरांसाठी.लागा तर डाळवडे खायच्या तयारीला. साहित्य:- १. अर्धी वाटी चणाडाळ २. पाव वाटी तूरडाळ ३. पाव वाटी मूगडाळ ४. पाव वाटी मसुरडाळ ५. पाव वाटी उडीदडाळ ६. पाव वाटी तांदूळ ७. मूठभर काळे वाटाणे ८. १०/१२ लसूणपाकळ्या ९. पेरभर आले १०. ४/५ हिरव्या मिरच्या ११. अर्धी वाटी बारीक चिरलेली मेथी १२.अर्धी वाटी बारीक चिरलेली कोथिंबीर १३. एक लहान कांदा बारीक चिरून १४. एक चहाचा चमचा मिरचीपूड १५. एक चहाचा चमचा धणेपूड १६. पाव चहाचा चमचा जिरेपूड १७. अर्धा चमचा गरम मसाला पूड १८.मीठ चवीनुसार १९. तेल तळण्यासाठी. कृती:- १. अनुक्रमांक १ ते ७ पर्यंतच्या वस्तू रात्री भिजत घाला. २. अनुक्रमांक १ ते १० पर्यंतच्या वस्तू ,पाणी न घालता दरदरीत वाटून घ्या. ३. अनुक्रमांक ११ ते १७ पर्यंतच्या वस्तू त्यात मिसळा व हाताने छान कालवून घ्या ४. तेल तापत ठेवा. ५. पाण्याचा हात घेऊन हातावर लिंबाएवढा गोळा घेऊन चपटा थापा. ६. गरम तेलात अलगद सोडा व लालसर रंगावर तळून ,निथळून काढा. ७.आधी करून ठेवलेल्या खोबऱ्याच्या चटणीसोबत आस्वाद घ्या.
वाचने 23801 वाचनखूण प्रतिक्रिया 31

संपादक मंडळ Mon, 12/18/2017 - 18:06
तुमच्या फेसबुक पेजवरच्या फोटोवर क्लिक करा व तो पूर्ण आकारात दिसू लागल्यावर मिळणारी त्याची लिंक मिपावर वापरा... चित्र मिपावर दिसू लागेल... आता दिसत आहे तसे.

दिपक.कुवेत Tue, 12/19/2017 - 17:08
मला हे वडे प्रचंड आवडतात आणि ते चहासोबत कुडुम कुडुम खायला अजून मजा येते. पण त्यात एवढ्या सगळ्या डाळी असतील माहित नव्हतं. मला वाटत होतं कि फक्त चणाडाळ घालून करतात. असो आता असे करुन पहातोच तशीहि ईथे थंडि आहेच. अजून एक काळे वाटाणे वाटले जातात?? माझ्या ईथे नाहियेत पण नसले तर चवीत एवढा फरक पडतो का? भांड्याला लागुन चटणी ठेवायचा कप्पा सहि आहे. सहिच पाकॄ आणि तोंपासू फोटो.

नूतन सावंत Tue, 12/19/2017 - 17:29
काळे वाटणे बारीकही वाटले जातात,पण आपल्याला जाडसरच वाटायचे आहेत.आणि त्याचा अर्धभाग दाताखाली आला की मस्त चव येते.पण नसलेच तर .... नसुदेत. आणि ती चटणी ठेवलेला छोटा बाउल वेगळा आहे,तो चिकटून ठेवल्याने फोटोत एकसंध वाटतोय.

रुपी Wed, 12/20/2017 - 09:26
वडे केले आणि फस्तपण झाले.. फोटोसाठी धीर धरवला नाही. मी पाव वाटी किनवापण घातला, काळ्या वाटाण्याऐवजी पांढरा घातला आणि मसूर डाळीऐवजी चुकून आख्खे मसूर घेतले ते तर वडे संपल्यावर लक्ष्यात आले =) माझा मुलगा म्हणाला की, असे वडे रोज कर :)

नूतन सावंत Wed, 12/20/2017 - 17:09
खऱ्या सुगरणीच असे बदल नकळतपणे घडवून आणतात आणि नव्या पाककृती जन्माला घालतात,चालुदेत अशीच खाद्ययात्रा.

अनिंद्य Wed, 12/20/2017 - 14:50
@ सुरन्गी, सुपर ! फोटो सुद्धा मस्त. आणि हा पदार्थ माझ्या सध्याच्या अटीसुद्धा पूर्ण करतोय - व्हेज, ग्लूटेन फ्री, हाय प्रोटीन.

चामुंडराय Wed, 12/20/2017 - 22:22
सुरेख दिसतायेत डाळवडे. तळलेले असून हि अजिबात तेलकट दिसत नाहीयेत, जसे काही बेक केले आहेत. अवांतर : लहान असताना एकदा हे डाळवडे खाल्यावर मला खूप जुलाब झाले होते. तेव्हा पासून या वड्यांना मी ढाळवडे म्हणतो :)

स्वाती दिनेश गुरुवार, 12/21/2017 - 22:04
मस्त दिसत आहेत ग डाळ वडे. मेथीने वेगळाच सुंदर स्वाद येत असणार.. डाळवडे आवडतातच पण हल्ली ए फ्रा करते मी ,:) स्वाती

मदनबाण Sun, 12/24/2017 - 11:43
आहाहा... :)

मदनबाण.....

आजची स्वाक्षरी :- मुझे कितना प्यार है तुम से, अपने ही दिल से पूछो तुम जिसे दिल दिया है वो तुम हो, मेरी जिंदगी तुम्हारी है :- Dil Tera Deewana [ Mohammed Rafi, Lata Mangeshkar ]