भुजणं/भुजणे

ही रेसिपी एका मिपा मैत्रिणीला हवी होती. मग इथेच दिली म्हणजे इतरांना पण उपयोग होईल. भुजणं अनेक प्रकारे बनवतात. ते जाडसर असतं. मुख्य घटक कांदा, आलं, लसूण, ओले खोबरे, कोथिंबीर आणि ओल्या हिरव्या मिरच्या हे हवेतच. मी ज्या प्रकारे बनवते ती कृती इथे देते आहे. मी फक्त बोंबलाचे भुजणे बनवते. परंतु बटाटा, वांगे, पापलेट, कोलंबी ह्याचे पण बनवता येते. तर बोंबलाचं भुजणं अशा प्रकारे... १. खूप मोठे बोंबिल असतील तर दोन तुकडे करायचे आणि लहान असतील तर तसेच अख्खे ठेवायचे. चांगले धुऊन घ्यायचे. २. त्याना चवीनुससार मीठ, १/४ चमचा हळद, १ चमचा लाल मिरची पावडर लावुन ठेवयची. मग २ कांदे, १ इंच आलं, ७-८ लसुण पाकळ्या, २-३ ओल्या हिरव्या मिरच्या व मूठ्भर कोथिंबीर हे सर्व कौशल्यपूर्ण जितकं बारीक चिरता येइल तितकं चिरायचं. हे सर्व प्रमाण वरील १० ते १२ बोंबलांसाठी लागू आहे. ३. मिक्सर मध्ये खोबरं कमीत कमी पाणी घालुन वाटायचं. वाटताना दम लागला म्हणुन थांबाल तेव्हा १ चमचा तांदळाचं पीठ घालायाचं. पुन्हा नव्या जोमाने वाटायचं. ४. हे सर्व करेपर्यंत बोंबलांत तिखट-मीठ मुरत असतं. तेव्हा जरा रमत गमत ही कामं केलीत तर बोंबिल चवीष्ट लागतील. ५. काही जण खोबरं न वाटता तसंच घालतात. तर काही जण खोबरं वाटताना अगदी थोडं थोडं आलं-लसूण-मिरची-कोथिंबीर पण वाटतात. पण मला ती चव-वास जास्त कडक-उग्र वाटते. म्हणुन मी खोबरे नुसतेच वाटते. ६. जेवणाची वेळ होत आली की कढईत १ पळीभर तेल गरम करायचं. त्यात कांदा मऊ होइपर्यंत परतायचा. मग मिरच्या-आलं-लसूण घालून आणि थोडा वेळ परतायच. ७. वाटलेलं खोबरं घालायचं. पाणी घालू नका. बोंबिल स्वतःच इतके पाणी पाणी होत असतात की आपण पाण्यासाठी हात आखडताच ठेवायचा. ८. बोंबलाना लावलेलं मीठ ध्यानात ठेवून बेताने मीठ घालायचं. ऊकळी आली की अलगद बोंबिल सोडायचे. ९. बोंबिल खूप नाजुक असतात. पटकन शिजतात. खूप ढवळू नका. मोडतील नाहीतर. कोथिंबीर घालुन एकदाच हलक्या हाताने ढवळा. झालं तयार आपलं बोंबलाचं भुजणं! गरम गरम खायचं. चपाती आणि भात दोन्हीबरोबर छान लागतं म्हणजे अगदी छानच लागतं. नक्की करुन बघा. टीप-शाकाहारी कृतीत तेलात हिंग, मोंहरी, कढिपत्ता याची फोडणी करुन मग कांदा घालावा. - उल्का कडले