चटपटा हांडवो- अनाहिता अन्नपूर्णा स्पर्धा उपविजेती पाककृती

महिला दिनानिमित्त अनाहितामध्ये वन डिश मिल या संकल्पनेवर आधारित "अनाहिता अन्नपूर्णा स्पर्धा "आयोजित करण्यात आली होती. या स्पर्धेतली ही उपविजेती पाककृती. पूर्ण जेवण म्हणून पदार्थ करताना तो सर्व घटक असणारा आणि दिसण्याबरोबर चवीलाही चांगला हवा म्हणून गुजराती/राज्स्थानी प्रकारात थोडे बदल करून ही पोटभरीची डीश चटपटीत करण्याचा प्रयत्न केलाय. साहित्यः १) हांडवोसाठी: तांदूळ २०० ग्रॅम, मूगडाळ ५० ग्रॅम, तूरडाळ ५० ग्रॅम, उडिदडाळ ५०ग्रॅम, चणाडाळ ५० ग्रॅम, दही १०० मिली., आलंपेस्ट एक टेबलस्पून, लसूणपेस्ट एक टेबल्स्पून, मिरची पेस्ट एक टेबलस्पून, मीठ दीड टीस्पून, साखर एक टीस्पून, तेल दोन टेबलस्पून, खायचा सोडा एक टीस्पून, हळद एक टीस्पून. भाज्या: गाजर किसून अर्धी वाटी, कोबी किसून अर्धी वाटी, दुधी किसून अर्धी वाटी, कांदा बारीक चिरून अर्धी वाटी, पाव वाटी कांदापात चिरून, पाव वाटी कोथिंबिर बारीक चिरून. भाज्या सर्व मिळून २००ग्रॅम. २) फोडणीसाठी: तेल दोन टेबलस्पून, पांढरे तीळ एक टीस्पून, मोहरी अर्धा टीस्पून, हळड अर्धा टीस्पून, कढीलिंब १० पाने. ३) हिरवी चटणी: तीन हिरव्या मिरच्या, मूठभर पुदिना, मूठभर कोथिंबिर, अर्धा टीस्पून शेंदेलोण, अर्धा टीस्पून पादेलोण, लागल्यास साधे मीठ, एक टीस्पून जिरे. ४) चिंच खजूर चटणी: १५ खजूर, १२ काळ्या मनुका, एक टेबलस्पून गूळ, एक टेबलस्पून चिंच, एक टीस्पून जिरे, एक टीस्पून धने, अर्धा टीस्पून शेंदेलोण, अर्धा टीस्पून पादेलोण, एक टीस्पून लाल तिखट, लागल्यास साधे मीठ. ५) सजावटीसाठी: बारीक पिवळी शेव, चीज दोन क्युब, सॉस. कृती:१) डाळी आणि तांदूळ धुऊन रात्री भिजत घालावेत. सकाळी दोन्ही गोष्टी रवाळ वाटाव्यात. वाटताना त्यात दही घालावे, इडलीच्या पिठाइतपत सैल हवे. पाणी लागल्यास घ्यावे, नाहीतर जादाचे पाणी वापरू नये. २) मिश्रण उबदार जागी सात्/आठ तास ठेवावे. ३) करायच्या आधी अर्धा तास तयारी करावी कोबी, गाजर, दुधी किसून घ्यावा. आलं लसूण मिरची यांची पेस्ट करावी. कांदापात, कोथिंबिर बारीक चिरावी. ४) हिरव्या चटणीचे सर्व साहित्य एकत्र करून वाटून घ्यावे. ५) चिंच, खजूर बिया काढून, मनुका थोड्या पाण्यात शिजवून घ्याव्या. बाकी साहित्य एकत्र करून चिंचखजूराची चटणी वाटून घ्यावी. ६) दोन टेबलस्पून तेलाची मोहरी, तीळ, कढीलिंबाची पाने, हळद घालून फोडणी करावी. ७) वाटलेल्या मिश्रणात. आलं, लसूण, मिरची पेस्ट, साखर, मीठ, खायचा सोडा, तेल, हळद आणि सर्व भाज्या मिक्स कराव्या. ८) फ्रायपॅनमध्ये केलेल्या फोडणी पैकी थोडी फोडणी घालावी. तयार मिश्रण ओतावे. थोडी फोडणी वरून घालावी. ९) फ्रायपॅन मंद गॅसवर ठेवावे. दहा मिनिटांनी उघडून पहावे. बाजू उलट करावी, परत ७/८ मिनिटे ठेवावे. सुरीचे टोक घालून चिकटत नाही ना ते पहावे. तयार हांडवो गार करण्यास ठेवावा. खरं तर हा तयार हांडवो असाचही छान लागतो. पण त्यावर चटण्या शेव किंवा सॉस लावून आणि चीज किसून घातल्यास मुलेही अगदी आवडीने खातात. १०) हांडवो गार झाला की त्याचे पिझ्झ्याप्रमाणे तुकडे करा. प्रत्येक तुकड्याला सॉस लावा. त्यावर चीज पसरा, आणि द्या मुलांना! ११) किंवा चिंच खजूर चटणी, हिरवी चटणी लावा आणि त्यावर बारीक शेव घालून खा. १२) हांडवो ओव्हनमध्ये करायचा झाल्यास २०० डिग्रीला प्रिहीट करून २०० डिग्रीवर ३५ ते ४० मिनिटे ठेवावे. १३) हांडवो इडलीप्रमाणे उकडूनही करता येतो. १४) झटपट होण्यासाठी सर्व डाळी आणि तांदूळ यांचे रवाळ पीठ करून ठेवावे. रात्री दही घालून ठेवल्यास भाज्या मिसळून सकाळी डब्यालाही करता येईल. भाज्या आपल्या आवडीप्रमाणे कोणत्याही घेता येतील.