केक रस्क

साहित्यः १. मैदा - १.५ कप २. बटर - १०० ग्रॅम ३. बेकिंग पावडर - १.५ चमचा ४. अंडी - ३ ५. साखर - १/२ कप किंवा आवडीप्रमाणे कमी/जास्त ६. तेल - १/४ कप ७. दूध - १/४ कप ८. व्हॅनीला ईसेंन्स - १ चमचा ९. फूड कलर - ऑप्शनल १०. चवीप्रमाणे मीठ कृती: १. ओव्हन १८० से. प्री-हीट करत ठेवा. एका भांड्यांत बटर, तेल आणि साखर फेटून घ्या. बटर क्रिमी आणि फ्लपी होईस्त फेटत रहा. २. आता मिश्रणात एक एक अंडं घालून फेटत रहा. दुसर्‍या एका भांड्यात मैदा, बेकिंग पावडर आणि मीठ घालून ३-४ वेळा चाळून घ्या जेणेकरुन सर्व एकजीव होईल. ३. आता क्रिमी झालेल्या बटर मधे व्हॅनीला ईसेन्स आणि फूड कलर घाला. हळू हळू मैदा आणि दूध घालत मिश्रण एकजीव करा जेणेकरुन एकही गुठळी राहणार नाही. ४. स्प्रींगफोर्म टिनला बटरचा हात लावून बटर पेपर ने कवर करा. मिश्रण घातलत की भांड हलकसं टॅप करा जेणेकरुन एअर बबल्स (हवेचे बुडबुडे??) निघून जातील. ५. प्री-हीट झालेल्या ओव्हन मधे २०-२५ मि. बेक करा. विणायची सुई किंवा सुरी खुपसून पहा. क्लीन बाहेर आली की केक झाला. ५ मि. केक ओव्हन मधेच राहू द्या. ६. केक पुर्ण गार झाला की हव्या त्या आकारात कापून घ्या. बेकिंग ट्रे मधे बटर पेपर घालून तुकडे केलेला केक परत १५-२० मि. किंवा स्लाईस क्रिस्पी होईस्त बेक करा. रस्क पुर्ण गार झाले की हवाबंद डब्यात भरुन चहासोबत कींवा नुसतेच खायचा आनंद घ्या. टीपा: १. चहासोबत रस्क खायचा प्लॅन असेल तर जरा कमी गोड चालतील. बच्चे कंपनीला डब्यातही देता येतील. २. तुकडे/केक स्लाईस जेवढा जाड तेवढा रस्क क्रिस्पी होण्यास वेळ लागेल. स्लाईस मोठा असेल तर रस्क्स बाहेरुन क्रिस्पी दिसतील पण आतून मॉईस्ट असतील. म्हणून लोफ टिन मधे केक केल्यास छान एकसारखे स्लाईस करता येतील. ३. वेगवेगळ्या फ्लेवर्सचे केक स्लाईस करुन जरा अधीक बेक केले की त्याच वेगवेगळ्या चवीचे रस्क होतील. करणारा आणि खाणारा दोघेही खुश. ४. एगलेस केक / रस्क साठि "दही" हा पर्याय पाहिला आहे पण अंड्यांनी केक जसा हलका होतो तो दह्याने कितपत होईल त्या बाबतीत जरा अजाण आहे. तरी एकदा प्रयत्न जरुर करणार आहे. ५. नुसता केक करणार असाल तर तेल जरुर घाला. तेलाने केक आतून मॉईस्ट राहतो आणि कोरडा होत नाही.