मंडळी, झाली का तयारी?

काय हे, अजून काहीच तयारी झाली नाहीये का? चला चला, आवरा पटापट...केव्हाचं सांगून ठेवलेलं आज निघायचं आहे म्हणून. चला चला बॅगा भरा... कुठून घेतल्या बॅगा विचारताय...ती किनई मजाच्च झाली. अनाहिता गेलेल्या ना 'सरस' ला तिथूनच आणल्यात. काय बाई, नुस्ता धुडगूस घातला एकेकीने प्रदर्शनात. तुम्हाला म्हणून सांगते, बोलू नका कुणाला...कुठे न्यायची म्हणून सोय नाही हो या बायकांना. वात आणला नुसता. हिरवे, काळे, नि़ळे मिळतील त्या रंगाचे मसाले उचलत होत्या, पीठं काय नि चहा काय एक वस्तू सोडली नाही. एकीने तर सहा कानातली उचलली. आहात कुठे? आता काय भा़जी करणार का सहा कानातल्यांची. पण ऐकणार नाहीत...जाऊदेत, तुम्ही आटपा लवकर...आधीच उशीर झालाय. कपडे अजून वाळतायतचं का दोरीवर.... हम्म, काय म्हणता, घालतच होतात का घड्या. बरं...बरं... छत्र्या घ्या हो आठवणीने, पाऊस असला तर उगाच तारांबळ नको. टोपी पण घ्या, काय उन्हं वाढलीत आजकाल.. तुम्हाला सांगते मागच्या वर्षी आम्ही त्या तिकडे गेलेलो ना... ऊन काय मी म्हणत होतं. आमचे हे...काय म्हणता, आमच्या ह्यांच्या गोष्टी नंतर सांगूका?, बर्र... आणि ते गॉगल काय आणून ठेवलेत ना काल.. ह्म्म्म भरले का ते? तिकिटं? अय्या पिकनिक बास्केट राहिलंच की....काय बाई इतकं हौसेने घेतलेलं या दिवसासाठी.. पाकिट कशाला घेताय... फुकट तर आहे सहल चपला घाला आठवणीने. कसं जायचं म्हणता...होडी आहे की तयार कधीपासून.. कुठे निघालोय विचारताय? अर्रर्र...मेन मुद्द्याचं राहिलंच..सॉरी, सॉरी बरं का, अहो अनाहिताचा भटकंती अंक आलाय ना! त्याच्याच सफरीवर निघालोय. चला, निघायचं का?