सुखाने जगू द्या रे! :)

राम राम मायबाप मिपाकरहो, अरे जरा सुखाने जगू द्या की रे..! अरे प्रत्येक विषयात वाद घालतांना वैयक्तिक पातळीवर नका रे उतरू! एक तर प्रत्येक विषयात दोन दोन, तीन तीन पानी वाद घालू नका आणि घातलात तरी वैयक्तिक चिखलफेक कृपया टाळा! हा पेश्शल घागा टाकण्याचे कारण म्हणजे मारुतीच्या शेपटीसारखे वाढत चाललेले, अंत नसलेले वाद आणि काही मंडळींनी त्यात केलेली वैयक्तिक शेरेबाजी! त्यामुळे होतं काय, की जेव्हा जेव्हा आम्ही लॉगईन होतो तेव्हा तेव्हा किमान चार व्य नि आणि खरडी आमची वाट पाहात असतात! मग तक्रारकर्त्याने दिलेल्या दुव्यावर जाऊन काय ते योग्य/अयोग्य ठरवा आणि योग्य ते संपादन करा..! सध्या आम्ही कामधंद्याच्या निमित्ताने खूपच गडबडीत आहोत आणि प्रत्येक वेळेला कुणाच्या ना कुणाच्या कंप्लेन्टीकडे लक्ष द्यायला आम्हाला खरोखरच टाईम नाही व तेवढा उत्साहही आमच्यापाशी नाही. आमची सर्व सन्माननीय संपादक मंडळीही आपापले उद्योगधंदे सांभाळून संपादनाचे काम करत असतात. त्यांनाही कमीत कमी त्रास व्हावा अशी इच्छा आहे! म्हणूनच आमच्यातर्फे आणि सर्व संपादक मंडळातर्फे पुन्हा एकवार अशी कळकळीची विनंती की वाद जरूर घाला, अगदी सहा-सहा पानी घाला, परंतु मुद्द्याला धरून घाला आणि कृपया वैयक्तिक शेरेबाजीवर अथवा हमरीतुमरीवर येऊ नका, किंबहुना लेखन करताना आपण असे करत नाही ना याची अवश्य काळजी घ्या.. समोरचा काही केल्या ऐकत नसेल तर त्याला प्रत्त्युत्तर देऊ नका. मोठ्या मनाने, "बरं बाबा, तू जिंकलास, तुझंच काय ते बरोबर, तुझीच काय ती लाल..!" असं मनातल्या मनात म्हणा आणि सोडून द्या रे! :) असो, अजून काय लिहू, बाकी आपण सूज्ञ आहातच..! :) आपला, (मुंबईत हवा जरा बरी असल्यामुळे स्वेटर घातलेला!) तात्यागणपती! :)