तिळगुळ (संक्रांतीचा हलवा)

साहित्य:

• अर्धा कप साखर
• पाव कप पाणी
• ३-४ छोटे चमचे दूध
• १ चहाचा छोटा चमचा तीळ,खसखस (जितके मोठे तिळगुळ हवेत तितके मोठे दाणे असलेली वस्तू घ्यावी. उदाहरणार्थ: बडीशेप,चारोळे, ई. मला छोटे तिळगुळ आवडतात म्हणून मी खसखस आणि तीळ घेतले होते.)

कृती: १. साखर,पाणी आणि दूध एकत्र करून पाक करून घ्यावा. (गुलाबजाम साठी करतो त्यापेक्षा घट्ट पाक असावा. मी मऊ गोळी करून पाहते.) २. दूध नासून जाते म्हणून पाक झाल्यावर एका कापडातून गळून घ्यावा. (यात दूध पांढऱ्या रंगासाठी घालतात असा असं आज्जी म्हणाली. पण पाक घट्ट झाल्यावर त्याची साखरच होते आणि ती पंढरीच असते.मग दूध कशासाठी? मला कळलं नाही. पण मी दूध घातलं. उगाच तेवढ्याश्या गोष्टीने चुकायला नको म्हणून.) ३. पाक कोमट झाला कि एका पसरट आणि जाड बुडाच्या भांड्यात खसखस आणि तीळ घ्यावेत. भांडे मंद आचेवर ठेऊन अगदी पाव चमचा पाक घालावा आणि हाताने तो सगळ्या खसखस आणि तिळाच्या दाण्यांना चोळावा. ४. हा झाला पाकचा पहिला थर. तो साधारण पाने अर्धा तास थंड होण्यासाठी ठेवावा. ५. आपल्याला हवे आहेत तितक्या मोठ्या आकाराचे तिळगुळ होईपर्यंत ३ आणि ४ पायरीची क्रमाने पुनरावृत्ती करत राहावी. हव्या असलेल्या आकाराप्रमाणे १ ते २ दिवस लागू शकतात तिळगुळ पूर्ण करायला. इतका सगळा द्राविडी प्राणायाम करण्यापेक्षा तिळगुळ दुकानातून आणणे सोपे आहे. पण सध्या जिथे राहतो तिथे ते मिळत नसल्याने आणि तिळगुळशिवय संक्रांत साजरी करणे चांगले न वाटल्याने घरीच करून पहिले. तिळगुळ करायचा आणि मिपावर पाककृती टाकायचाही पहिलाच प्रयत्न आहे. गोड मानून घ्याल अशी आशा आहे. तिळगुळ घ्या..गोड गोड बोला..!!!