Skip to main content

मसूर - मेथी

लेखक दिपक.कुवेत यांनी गुरुवार, 03/12/2015 13:57 या दिवशी प्रकाशित केले.
Methi 1 साहित्यः १. मेथी जुड्या - ३ ते ४ २. मसूर डाळ - पाव वाटी ३. कांदा - १ मध्यम ४. टोमॅटो - १ मध्यम ५. लसूण पाकळ्या - २ (ठेचून किंवा बारीक चीरुन) ६. जिरं / मोहरी - १/२ चमचा प्रत्येकी ७. तेल - ३ ते ४ पळ्या ८. गरम मसाला - १/२ चमचा ९. लाल तिखट किंवा मसाला - चवीनुसार १०. हळद - पाव चमचा ११. अर्ध्या लिंबाचा रस १२. चवीनुसार मीठ / साखर कृती: १. मसूर डाळ स्वच्छ धुवून भिजत घाला २. कांदा/टोमॅटो बारीक चिरुन घ्या ३. मेथी स्वच्छ धुवुन बारीक चिरुन घ्या ४. नॉनस्टिक कढई किंवा पॅन मधे तेल तापलं कि जिरं / मोहरी घालून तडतडू द्या ५. चिरलेला कांदा / लसूण घालून परता. कांदा जरा मऊ झाला की भिजवलेली डाळ घाला. डाळ खाली लागू नये म्हणून डाळ भिजेल इतपतच पाणी घालून डाळ कोरडी होईस्तोवर शिजवा ६. डाळ शिजली की अनुक्रमे हळद, तिखट किंवा मसाला, गरम मसाला, मीठ आणि साखर घालून एक २-३ मि. परता. नंतर टोमॅटो घालून कडेने तेल सुटेस्तोवर परता ७. बारीक चिरलेली मेथी घाला. मेथी शिजली आणि कडेने परत तेल सुटायला लागलं की गॅस बंद करा. लिंबाचा रस घालून भाजी सारखी करा ८. गरमागरम आणि चविष्ट मसूर-मेथी पोळी, फुलका किंवा भाकरी बरोबर सर्व करा. स्पेशली भाकरी सोबत सायीचं दही आणि मिरच्यांचा ठेचा असेल तर अहाहा.... टीपा: १. मेथी एवजी कांद्याची पात किंवा पालक घेऊ शकता कींवा मेथी-पालक, मेथी-कांद्याची पात काँम्बो पण छान लागतं. कांद्याची पात असेल तर मग वेगळा कांदा घालायची गरज नाही २. मसूर-मूग डाळही एकत्र घेउ शकता ३. काही भाज्यांत तेल अंमळ जरा जास्त असलं तरचं मजा येते नाहीतर भाजी कोरडी लागते (असं माझं मत) Methi 2
वाचने 21112
प्रतिक्रिया 44

प्रतिक्रिया

जातवेद गुरुवार, 03/12/2015 14:03
(असं माझं मत)
एकदम वाटलं माईसाहेबांनी लिहीले आहे कि काय, परत वर जाऊन बघितले आणि हुश्श केले!

दिपक.कुवेत गुरुवार, 03/12/2015 17:58
कारण माईसाहेब नेहमी त्यांच्या "ह्यांच्या (च)" म्हणण्याला दूजोरा देतात!! आमचे हे असं म्हणत होते, आमचे हे तसं म्हणतात वगैरे...

दिपक.कुवेत शुक्रवार, 04/12/2015 13:24
"असं सीनीयर सीटीझन्स ना छळु नये रे बाळा. थांब आमच्या ह्यानांच सांगते तुझं नाव. चांगली खबर घेतील ते तुझी. मग माई माई मला वाचव करत येउ नकोस" माई मोड ऑफ

जातवेद शुक्रवार, 04/12/2015 22:26
हे शिनिअर लोक्स काय काय पदव्या देतील सांगता येत नाही. - आजोबा (पदवीधारक) जातवेद

दिपक.कुवेत शनिवार, 05/12/2015 13:14
हे सांडगे रेडिमेड मिळतात का? म्हणजे येताना एक पाकीट आणीन कारण आमच्या घरी काय करत नाहीत.

मितान गुरुवार, 03/12/2015 18:13
व्वा ! मी सेम प्रकार कांदापात वापरून करते. मेथी मिळाली की लगेच करणार ही भाजी !!

डॉ सुहास म्हात्रे गुरुवार, 03/12/2015 18:29
मस्त ! तोंपासू ! आदल्या दिवशी भिजत टाकलेली अख्खी मसूर वापरूनही ही भाजी फक्कड लागेल असे वाटते.

स्रुजा गुरुवार, 03/12/2015 18:31
अरे वा ! मेथी काल च संपवली पण कांद्याची पात आहे घरात. करुन बघण्यात येईल. नेहमीप्रमाणेच उत्कृष्ट !

कंजूस गुरुवार, 03/12/2015 19:16
चविष्ट लागणार यात शंकाच नाही.परंतू मार्केट यार्डातून मेथीच्या जुड्या आणल्या तर "तीन चार जुड्या"म्हणजे मसूर-मेथी-कहर होईल इतक्या मोठ्या असतात.अर्धीच पुरेल.ओंजळभर मेथी पाने एक वाटी मसुरासाठी हे प्रमाण ठीक वाटतंय दिपक.

दिपक.कुवेत शुक्रवार, 04/12/2015 13:25
मेथी जुड्यांच प्रमाण हे आमच्या ईथे ज्या आकारमानात मीळतात त्यानुसार दिले आहे. तुम्ही ते तुमच्या अंदाजानुसार घ्या.

स्वाती दिनेश गुरुवार, 03/12/2015 20:02
छान दिसते आहे. मेथी मिळाली की करण्यात येईल, स्वाती

पिशी अबोली गुरुवार, 03/12/2015 21:48
मेथीजुडी अर्धी वापरून आत्ताच केली. मेथी आवडते, मसूर फार खाल्ली जात नाही म्हणून लगेच करून टाकली. फक्त आळस नावाच्या जिवलग सख्याच्या आग्रहामुळे डाळ भिजवलेलं पाणी त्यात टाकून तीच भातासोबत ओरपण्याजोगी केलेली आहे. तुमच्या सूचनांचे पालन शक्य तसे केल्याने चव माझ्या पाककौशल्याच्या ष्टयांडर्डपेक्षा काहीच्याकाही चांगली लागत आहे.

उगा काहितरीच शुक्रवार, 04/12/2015 00:57
मेथीचा कुठलाही प्रकार आवडतो. पण आमच्या घरी मसुर दाळ आणत वा खात नाहीत. रच्याकने नैवेद्याला मसुर दाळ का चालत नाही ? याचे कारण माहीत आहे का कुणाला ? -मेसमधे अख्खा मसुर आवडीने खाणारा !

मीअपर्णा शुक्रवार, 04/12/2015 01:20
मला कांद्याच्या पातीचं काय करायचं हा एक नेहमीचा प्रश्न असतो अदर दॅन फ्राईड राइस किंवा दलिया उपमाच्या फोडणीत खपवणे आणि पीपे भाज्या माझ्याच्याने होत नाहीत. आता एकदा मसूर-डाळ घालून पाहीन. अ‍ॅज इज कृतीपण छान आहे.नेहमी मेथी मिळत नाही. माझी आई मसूर डाळ घालून कारलं करते फक्त त्यात मला वाटतं टॉमेटो नसतो. मला ती यासाठी आवडते की मग प्रोटीनचा वेगळा विचार करावा लागत नाही. अतिशय मंद आच करून झाकणावर पाणी घालून शिजवणे ही तिची टीप आहे आणि बंद करायच्या आधी घरगुती गरम मसाला घालून ढवळून ठेऊन द्यायचं.

मीअपर्णा रविवार, 06/12/2015 06:25
आईची कृती हा अटकपूर्व जामिन होता भाऊ...आईच्या पाकृ कधी कुणी डिट्ट्लेवार लिहितं का? म्हंजे आईला तरी ते शक्य आहे का? असो. मला वाटत तुमचीच ओरिजिनल कृती लेस टोमॅटो आणि कारलं शिजायला वेळ लागतो म्हणून चकत्या कापून मिठातून पिळल्या की डाळ कारलं एकत्र शिजवावं. आणि त्या टिप्स आहेतच वरती.

सस्नेह शुक्रवार, 04/12/2015 10:40
जरा जरा डाळ-मेथी सारखी वाटली. पण ही भाजी हिरवी नाही दिसत ?

दिपक.कुवेत शुक्रवार, 04/12/2015 13:28
ओह लब्बाड बरोब्बर ओळखलसं..... मग आता सांग पाहू भाजीचा कलर. रच्याकने मला पण समजेल.

अनिता ठाकूर शुक्रवार, 04/12/2015 18:13
मसूर वेगळे, मसूर डाळ वेगळी. मसूर काळे असतात, मसूर डाळ केशरी असते. ही 'मसूर डाळ मेथी' अशी पा.कृ. दिसते आहे.

दिपक.कुवेत शनिवार, 05/12/2015 13:17
तुम्ही खुलासा केला तेव्हा मला कळलं मसूर डाळ आणि आख्खा मसूर मधला फरक. खूप खूप धन्यवाद. अशीच मौलीक (?) माहिती देत जा (अधून मधून).

कंजूस शनिवार, 05/12/2015 09:13
मेथीच्या पानापानावर "भरपूर तेल ओतावं" असा वैधानिक इशारा लिहिलेला वाचला नाहीत का?पाण्यातल्या भाज्या पित्तकर असतात आणि कडूझारही होतात. यात दोन प्रकार आहेत १) मेथा - पाने जाड आणि काळसर हिरवी ,फार कडू, २ ) कसुरी मेथी :- पाने कोमल फिकट हिरवी कमी कडू .दांडे फिकट पोपटी.हीच मेथी पराठा करण्यासाठी उत्तम. वाळवून अॅल्युमिनिअम फॅाइलच्या पिशवीत ( बिस्किटांना,चहापाउडरला येते तसली) ठेवल्यास स्वाद उत्तम राहतो.थोडे अवांतर झाले.

दिपक.कुवेत शनिवार, 05/12/2015 13:23
आमच्याकडे पहिल्या प्रकारातीलच मेथी मीळते. पण मला स्वःताला आपल्याकडे ती अगदी बारीक मेथी मीळते ना ती खूप आवडते. बोंडं प्रकार छान होतो त्याचा. शीवाय वरच्या प्रकारानेही छान लागते.

कंजूस शनिवार, 05/12/2015 13:59
तुझ्याकडच्या मेथीचा फोटो टाक.बहुतेक "सागर मेथी असावी" त्याच्या तीन चार जुड्या चालतील.मेथी दाणे वाळूत पेरतात.उगवून तीन चार ईंच उंच आणि दोनच पाने ,खाली लांब दांडी आणि पांढरी शुभ्र मुळे असतात.ही उपटून ( वाळूमुळे सहज निघते) पाण्यात हलवली की मुळांची वाळू लगेच सुटते.याच्या जुड्या विकायला येतात.जुडीची फक्त मुळांकडचा भाग कापून वापरतात.हीच वापरली आहे का?यालाही तेल फार लागते.