बाप्पाचा नैवेद्य : ड्रायफ्रुट्स मोदक

साहित्यः १.५ वाटी सीडलेस खजूर, तुकडे करुन घ्यावे. १/२ वाटी बदाम १/२ वाटी काजू १/४ वाटी बेदाणे १/४ वाटी डेसिकेटेड कोकोनट २ टेस्पून खसखस १/२ टीस्पून वेलचीपूड पाकृ: काजू-बदाम बेताचे चॉप करुन घेणे. पॅनमध्ये काजू-बदाम कोरडेच हलक्या तांबूस रंगावर भाजून घेणे. भाजलेले काजू-बदाम प्लेटमध्ये काढावे. त्याच पॅनमध्ये आता खोबरे + खसखस सोनेरी रंगावर भाजून घ्यावे. हे सुद्धा वेगळ्या प्लेटमध्ये काढावे. पॅनमध्ये एक चमचा साजूक तूप गरम करुन त्यात चिरलेला खजूर व बेदाणे घालावे. सतत परतावे, खजुर-बेदाण्याचा गोळा होऊन लागेल तेव्हा गॅस बंद करावा. मिश्रण गार होऊ द्यावे. काजू-बदामाची मिक्सरवर भरडसर पूड करुन घ्यावी. खजूर-बेदाणेच्या मिश्रणात काजू-बदामाची पूड, खोबरे + खसखस व वेलचीपूड घालून चांगले मिक्स करावे. पेढे-मोदकाच्या साच्यात मिश्रण भरून मोदकाचा आकार द्यावा. हे मोदक अतिशय चविष्ट बनतात व ह्यात खजूराचा, बेदाण्याचा गोडवा पुरेसा होतो. हे मोदक तुम्ही गणपतीत प्रसादाला देऊ शकता. ह्या प्रमाणात १५-१६ मोदक होतात, जास्तं प्रमाणात बनवयाचे असतील तर साहित्याचे प्रमाण वाढवावे. गणपती बाप्पा मोरया !! तुम्हा सर्वांना गणेशोत्सावाच्या हार्दिक शुभेच्छा !! __/\__