[शतशब्दकथा स्पर्धा] डिझाईन

आई ग्ग!! लाथा मारतो की गम्मत करतो हा? फुटबॉल खेळणार नक्की कार्टा.." ती पोटाकडे पहात कौतुकाने म्हणाली.
तो मस्तपैकी हसला..

~
"बाई, तुमच्या मुलाची ओपन हार्ट सर्जरी करावी लागेल.."
"....."
"घाबरू नका. तो पुर्ण बरा होईल."
"फुटबॉल खेळेल?"

दाराआडुन त्याने चटकन डोळे पुसले..

~
डोळे उघडत नाही, दुध पित नाही, टिचकी मारली तरी रडत नाही.
ती तिचं पिल्लु कणाकणानी मरताना बघत होती..

तो... डॉक्टरांमागे पळत होता..

~
"ऑपरेशन तर झालं, पण धोका टळलेला नाही." डॉक्टर म्हणाले..

नळ्यांमध्ये वेढलेल्या व्हेंटीलेटरवरच्या जीवाला पाहुन तिने आवंढा गिळला.

तो गप्पच होता.. दोन दिवस..

~

"आई... डिझाईsssssन!!!!!"

छातीवरच्या टाक्यांच्या खुणाकंडे पहात पोरगं थुईथुई नाचत होतं.

तो पुन्हा एकदा मस्तपैकी हसला!