काँबीनात्सिऑन (प्रकार २)

बाहेर मस्त पाऊस पडत असताना भजी, वडे सगळेच खातात. हा पास्ता काँबीनात्सॉन ट्राय करून पहा. वेगवेगळ्या प्रकारच्या पास्त्यांचे इटालियन काँबीनात्सिऑन तुमच्यासाठी- काँबीनात्सिऑन (प्रकार १) तुम्हाला माहित आहेच. नवीन मंडळींसाठी त्याची लिंक देते आहे. साहित्य- फुसिली, पेन्नं, फार्फल अशा वेगवेगळ्या प्रकारचा पास्ता प्रत्येकी १ बाऊल ३ टोमॅटो किवा टोमॅटो प्युरी १ मोठा बाऊल भरून १ कांदा बारीक चिरलेला लसूण २ चमचे १ चमचा बासिलिकुम ( ड्राय बेसल पावडर) १ चमचा रोझमारिन (ड्राय रोझ मेरी पावडर) १ चमचा पिरपूड मीठ चवीनुसार १ टेबलस्पून ऑलिव्ह ऑइल १ बाऊल भरून किसलेले चीज २०० मिली फ्रेश क्रिम १ कप दूध+ १ टेबलस्पून मैदा कृती- टोमॅटो पाण्यात घालून शिजवा, निथळू द्या, नंतर साले काढून गर मिक्सरला फिरवा अथवा तयार प्युरी घ्या. दुधात मैदा विरघळून घ्या. वेगवेगळे पास्ता शिजायला वेगवेगळा वेळ लागतो म्हणून प्रत्येक प्रकारचा पास्ता वेगळा शिजवून घ्या. एका पातेल्यात पाणी उकळत ठेवा त्यात एक प्रकारचा पास्ता घाला आणि शिजवा. शिजल्यावर चाळणीवर घालून पाणी पूर्ण निथळू द्या. दुसरा पास्ता शिजला की पहिला प्रकार चाळणीतून ताटलीत काढा म्हणजे तेवढ्या वेळात पाणी पूर्णपणे निथळेल. कांदा उभा चिरा, मग त्याचे पेराएवढे तुकडे करा. ऑलिव्ह ऑइल गरम करा, त्यात लसणीची पेस्ट घाला, परता, कांदा घालून परता व शिजू द्या. कांदा ट्रान्सपरंट होईल टोमॅटो प्युरी घालून शिजवा. बेसल पावडर, रोझमारीन, मिरपूड घाला व एक दोन उकळ्या येऊ द्या. मैदा मिसळलेले दूध घाला, उकळू द्या. फ्रेश क्रिम घाला. मीठ घाला. एक उकळी आल्यावर आच बंद करा. आता सॉस तयार झाले. त्यातील निम्मे सॉस बाजूला काढून ठेवा. एका बेकिंग मोल्ड मध्ये शिजवलेला पास्ता घाला. त्यावर निम्मे सॉस ओता व ६-७ तास मुरवत ठेवा. संध्याकाळी पास्ता खायचा असेल तर सकाळी मुरवत ठेवा व दुपारी खायचे असेल तर रात्रीच मुरवत ठेवा. जेव्हा पास्ता काँबीनात्सॉन करायचे आहे तेव्हा आधी पास्ता व सॉसचे मिश्रण सारखे करून घ्या. त्यात थोडे चीज घालून एकसारखे करा. उरलेले निम्मे सॉस त्यावर घाला व हलके ढवळून सारखे करा. सर्व पास्ता चीजने झाका. २०० अंश से वर २५-३० मिनिटे बेक करा. गरम गरम खा.